Bala qaýipsizdigi: 2026 jyly qandaı ózgeris boldy
ASTANA. KAZINFORM – Balalardyń qaýipsizdigi men quqyqtyq qorǵalýyn qamtamasyz etý máseleleri asa mańyzdy. Qazir bul baǵyttar Memleket basshysynyń «Zań men tártip» jalpy qaǵıdatymen úndestirilgen.
Bul baǵyttaǵy negizgi basymdyq erte profılaktıkaǵa jáne qaýipsiz bilim berý ortasyn qalyptastyrýǵa berilgen. 2025 jyldyń qyrkúıeginen bastap eldiń barlyq mektepteri men kolledjderinde normatıvtik tártipte «DosbolLIKE» jáne KiVa antıbýllıng baǵdarlamalary engizildi, sondaı-aq kámeletke tolmaǵandarǵa qatysty zorlyq-zombylyq nemese qatygez qarym-qatynas faktilerine memlekettik organdardyń biryńǵaı áreket etý algorıtmderi bekitildi. Úkimettiń baspasóz qyzmeti habarlaǵandaı, óńirlik deńgeıde barlyq oblysta mamandandyrylǵan psıhologııalyq qoldaý ortalyqtary ashylyp, jumys istep jatyr.
Sonymen qatar memlekettik baqylaý aıtarlyqtaı kúsheıtildi. Ýákiletti organdardyń tekseristeri endi mindetti túrde mekteptegi tamaqtaný sapasyn, psıhologııalyq-pedagogıkalyq súıemeldeýdiń tolyqtyǵyn jáne erekshe bilim berý qajettilikteri bar balalardyń quqyqtarynyń saqtalýyn qamtıdy.
2026 jylǵy negizgi quqyqtyq ózgeris – balalardyń quqyǵyn qorǵaý salasyndaǵy buzýshylyqtar úshin tikeleı ákimshilik jaýapkershiliktiń engizilýi boldy. Endi býllıng faktilerin elemeý, ashanalardaǵy tamaqtandyrýdy uıymdastyrýdaǵy kemshilikter nemese tıisti profılaktıkalyq jumystyń júrgizilmeýi úshin oqý oryndarynyń basshylyǵy men jaýapty tulǵalar zań aldynda jeke jaýapkershilikke tartylady.
Osy jumysty jergilikti deńgeıde úılestirý úshin ákimdikter qurylymynda balalardyń quqyqtaryn qorǵaý jónindegi basqarmalar túrindegi jeke salalyq vedomstvolar qurylyp jatyr. Olar mektepter, qamqorshylyq organdary, psıhologııalyq qyzmetter men áleýmettik mekemeler arasyndaǵy ózara is-qımyldy tikeleı úılestiredi.
Mamandardyń júktemesin azaıtyp, jumystyń sapasyn arttyrý maqsatynda alǵash ret zańnamalyq deńgeıde qamqorshylyq organdary úshin qatań kadrlyq normatıv bekitildi: 5 myń balaǵa keminde bir ınspektor qarastyrylǵan.
Osylaısha, «Qazaqstan balalary» tujyrymdamasynda kózdelgen keshendi tásil shashyrańqy qoldaý sharalaryn biryńǵaı, ashyq ári tehnologııalyq ekojúıege aınaldyrýǵa múmkindik beredi.
Infraqurylymdy qarjylandyrý, tikeleı tólemder, tsıfrlyq vaýcherler jáne Ulttyq qordaǵy maqsatty shottar – munyń barlyǵy eldiń adamı kapıtalyna baǵyttalǵan uzaqmerzimdi memlekettik ınvestıtsııalar.
Úkimet óz tarapynan balalardy qorǵaý, qaýipsiz ári damytýshy orta qalyptastyrý máselelerin erekshe baqylaýda ustap, tabysty pılottyq jobalardy kezeń-kezeńimen keńeıtýdi jáne árbir jas qazaqstandyq úshin ınstıtýtsıonaldyq kepildikterdi kúsheıtýdi jalǵastyratynyn málim etti.
Aıta keteıik, balalar densaýlyǵyn qarjylandyrý bes jylda eki eseden astam ósti.
