Balalardyń ınternetten ne kórip otyrǵany ata-analardyń erekshe baqylaýynda bolýy kerek - mınıstrlik

ASTANA. KAZINFORM - QR Oqý-aǵartý mınıstrligi Balalardyń quqyqtaryn qorǵaý komıteti balalardyń kıberqaýipsizdigin qamtamasyz etýge qatysty alańdaýshylyq bildirýde.

Internet jelisindegi kez kelgen qaýip-qaterdiń aldyn alý jáne balalardyń qaýipsizdigin qamtamasyz etýdi kúsheıtý maqsatynda Komıtet bul salada jaýapty memlekettik organdar – QR Mádenıet jáne aqparat mınıstrligine, QR Іshki ister mınıstrligine zııandy tsıfrlyq oıyndarǵa monıtorıng júrgizý jáne buǵattaý boıynsha sheshýshi sharalar qabyldaý jóninde hat joldady.

Sondaı-aq Komıtet buǵan deıin balalardyń onlaın qaýipsizdigin kúsheıtýge baǵyttalǵan naýqandarǵa bastamashy bolǵanyn eske salamyz. Atap aıtqanda, jaǵymsyz kontentke qol jetkizýdi shekteý úshin «Ata-ana baqylaýy» fýnktsııasyn ornatý. Budan bólek, 1 qyrkúıekten bastap barlyq bilim berý uıymdarynda «Jeke qaýipsizdik» sabaqtary engizilip, balalarǵa ınternettegi qaýip-qaterden qorǵaný, ózin-ózi saqtaý daǵdylaryn damytý jáne túrli qaýip pen synı saǵatta durys minez-qulyq tanytý jóninde túsindirilýde.

«Bizdiń basty mindetimiz - balalardyń qaýipsizdigin qamtamasyz etý. Ata-analar balalarynyń qoldanatyn saıttaryn qadaǵalap, onyń onlaın belsendiligine erekshe nazar aýdarýy kerek. Ásirese, ata-ana baqylaýynyń qoljetimdi quraldaryn mindetti túrde qoldaný qajet. Balamen kúndelikti qarapaıym ǵana áńgimelesý, balalardyń ómirine qatysý - olar úshin qaýipsiz keńistik qurýdyń jalǵyz joly. Óz kezeginde jaýapty memlekettik organdar mundaı qaýip-qaterlerge tosqaýyl qoıý úshin qoldan kelgenniń bárin jasaıdy», - dep atap ótti QR Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova.

Bul máseleniń túbegeıli sheshilýin QR Oqý-aǵartý mınıstrligi Balalardyń quqyqtaryn qorǵaý komıteti baqylaýda ustaıtyn bolady.