Balalardyń ınternet qaýipsizdigi: álemdik tájirıbe qandaı? — sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Ortalyq Azııadaǵy alǵashqy lıýks týrıstik poıyz jobasy boıynsha kelisimge qol qoıyldy — ÓzA
Tashkent halyqaralyq ınvestıtsııalyq forýmy aıasynda Ortalyq Azııadaǵy alǵashqy lıýks sanatyndaǵy týrıstik poıyz — «Samarqand Ekspress» jobasyn iske asyrý jónindegi úshjaqty kelisimge qol qoıyldy.
Bul týraly «ÓzA» aqparat agenttigi habarlady.
Qujatqa Italııanyń Arsenale International kompanııasynyń bas dırektory Raffaele Breskı, Ózbekstan Mádenıet jáne ónerdi damytý qorynyń tóraıymy Gaıane Ýmerova jáne «Ózbekstan temir joldary» basqarma tóraǵasynyń birinshi orynbasary Hıkmatýlla Rahmetov qol qoıdy.
Ózbekstandyq BAQ-tyń keltirgen derekterine súıensek, joba Ózbekstannyń temirjol ınfraqurylymyn jańǵyrtyp, eldiń mádenı murasyn halyqaralyq deńgeıde tanytýǵa baǵyttalǵan. «Samarqand Ekspress» Tashkent, Samarqand, Buhara jáne Hıýa qalalaryn baılanystyryp, týrısterge Uly Jibek jolynyń tarıhı baǵyttarymen jaıly jaǵdaıda saıahattaýǵa múmkindik beredi.
Poıyzdyń ıntereri ıtalııalyq dızaın men ózbek ulttyq mádenıetiniń elementterin úılestiredi. Sonymen qatar joba aıasynda týrızm salasyna qajetti mamandar daıarlaý, jańa jumys oryndaryn ashý jáne halyqaralyq qyzmet kórsetý standarttaryn engizý kózdelgen. Alǵashqy reıs jaqyn ýaqytta iske qosylady dep josparlanyp otyr.
Sondaı-aq «ÓzA»-da «Almaty men Úrgenish arasynda tikeleı áýe reısi ashylady» degen taqyryptaǵy aqparat jarııalandy.
Atalǵan basylymnyń málimetinshe, Qazaqstannyń «FlyArystan» áýe kompanııasy 2026 jylǵy 3 qyrkúıekten bastap Almaty — Úrgenish — Almaty baǵyty boıynsha jańa halyqaralyq reısti iske qosady. Reıster aptasyna eki ret — beısenbi jáne jeksenbi kúnderi oryndalady.
Habarlamada aıtylǵandaı, jańa baǵyt Qazaqstan men Ózbekstan arasyndaǵy áýe qatynasyn keńeıtip, týrıstik, iskerlik jáne otbasylyq saparlarǵa qosymsha múmkindik beredi. Sarapshylardyń pikirinshe, bul bastama eki el arasyndaǵy baılanystardy nyǵaıtyp, óńirdiń týrıstik tartymdylyǵyn arttyrýǵa yqpal etedi.
Úrgenish — Horezm oblysynyń basty áýe qaqpasy ári ıÝNESKO-nyń Búkilálemdik muralar tizimine engen tarıhı Hıýa qalasyna baratyn negizgi baǵyttardyń biri. Jolaýshylar sondaı-aq Almaty arqyly halyqaralyq áýe jelilerine qosylý múmkindigine ıe bolady.
Iran Qazaqstanmen kólik-logıstıkalyq yntymaqtastyqty nyǵaıtady — Eurasia Today
Iran Islam Respýblıkasynyń Jol jáne qala qurylysy mınıstri Farzane Sadeq Qazaqstanǵa sapary barysynda eki el arasyndaǵy kólik-logıstıkalyq yntymaqtastyqty odan ári nyǵaıtý jáne buryn qol jetkizilgen ýaǵdalastyqtardy is júzinde júzege asyrý maqsaty kózdelgenin málimdedi. Bul týraly ol Astanada Premer-mınıstrdiń orynbasary — ulttyq ekonomıka mınıstri Serik Jumanǵarınmen ótken kezdesýde aıtty, dep habarlaıdy Eurasia Today aqparat agentti.
Atalǵan basylymnyń dereginshe, Qazaqstan tarapy Irandy óńirdegi mańyzdy saýda-ekonomıkalyq seriktes retinde atap ótip, ekijaqty yntymaqtastyqtyń strategııalyq mańyzyn rastady. Taraptar 2025 jyly eki el arasyndaǵy taýar aınalymy 26,4%-ǵa ósip, 430,2 mln dollarǵa jetkenin, al saýdany 3 mlrd dollarǵa deıin ulǵaıtý áleýeti bar ekenin jetkizdi.
Kelissózderde «Soltústik–Ońtústik» halyqaralyq kólik dálizin damytý jáne tranzıttik tasymal kólemin arttyrý máselesi erekshe qaraldy. Sondaı-aq temirjol jáne port ınfraqurylymyn damytý, onyń ishinde Shahıd Radjaı, Chabahar jáne Kaspıı teńizi baǵyttaryndaǵy jobalar talqylandy.
Beıjińde Qytaı men Qazaqstannyń úshinshi saraptamalyq ortalyqtar forýmy ótti — Halyq gazeti
12 maýsymda Beıjińde «Qytaı men Qazaqstannyń úshinshi saraptamalyq ortalyqtar forýmy» ótti. «Qytaı men Qazaqstan: ortaq damý jáne jańǵyrtý» taqyrybyndaǵy jıynǵa eki eldiń ǵylymı-zertteý ınstıtýttarynan 50-den astam sarapshy men ǵalym qatysty. Bul týraly osy aptada Qytaıdyń Halyq gazeti basylymy habarlady.
Qytaılyq BAQ-tyń málimetinshe, forýmda Qytaı ǵylym akademııasynyń Reseı–Shyǵys Eýropa–Ortalyq Azııa ınstıtýtynyń dırektory Sýn Chjýanchjı men Qazaqstan Respýblıkasy Prezıdentiniń janyndaǵy Strategııalyq zertteýler ınstıtýtynyń dırektory Jandos Shaımardanov sóz sóılep, halyqaralyq jaǵdaıdyń ózgerýi aıasynda saraptamalyq ortalyqtardyń róli artyp kele jatqanyn jáne ekijaqty yntymaqtastyqtyń jańa kezeńge aıaq basqanyn atap ótti.
Qatysýshylar Qytaı men Qazaqstannyń saýda-ekonomıka, energetıka jáne tsıfrlyq ekonomıka salalaryndaǵy yntymaqtastyq áleýeti joǵary ekenin aıtty. Forým Qytaı ǵylym akademııasynyń Reseı–Shyǵys Eýropa–Ortalyq Azııa ınstıtýty men Qazaqstan Respýblıkasy Prezıdentiniń janyndaǵy Strategııalyq zertteýler ınstıtýtynyń birlesip uıymdastyrýymen ótti.
Sondaı-aq, Halyq gazeti basylymynda «ıÝnnandaǵy bir aǵashqa 110-ǵa jýyq ara uıa salǵan» degen taqyryptaǵy qyzyqty aqparat jaryq kórgen.
Atalǵan BAQ-tyń dereginshe, Qytaıdyń ıÝnnan ólkesindegi Pýer qalasyna qarasty Lantsan Lahý avtonomııalyq aýdanyndaǵy Tszınmaı taýynda ósetin bıiktigi shamamen 50 metrlik taý injir aǵashynyń butaqtaryna 110-ǵa jýyq ara uıa salǵan. Erekshe kórinis jergilikti turǵyndar men týrısterdiń qyzyǵýshylyǵyn týdyryp otyr.
Jergilikti halyq bul aǵashty «Ara patshasy aǵashy» dep ataıdy. Іri merekeler kezinde turǵyndar osynda kelip, dástúrli «ara shaqyrý» rásimin ótkizedi. Sonymen qatar aǵashqa jaqyndap, uıalardy buzýǵa nemese bal jınaýǵa qatań tyıym salynǵan.
Mamandardyń aıtýynsha, aralar men ózge de jándikter óńirdegi ejelgi shaı aǵashtaryn tozańdandyrýda mańyzdy ról atqarady. Sondyqtan «Ara patshasy aǵashy» bıoalýantúrliliktiń jáne tabıǵat pen jergilikti mádenıettiń úılesimdi baılanysynyń sımvoly sanalady.
Iran men Qazaqstan saýda almasýyn 3 mıllıard dollarǵa deıin arttyrý maqsatyn qoıdy – ParsToday
Iran men Qazaqstan ekijaqty saýda aınalymyn 3 mıllıard AQSh dollaryna deıin jetkizýge ýaǵdalasty. Bul týraly Qazaqstanda ótken eki el mınıstrleriniń kezdesýinde aıtyldy, dep jazdy ParsToday.
Irandyq aqparat agenttiginiń habarlaýynsha, Irannyń Jol jáne qala qurylysy mınıstri Farzane Sadeq ekijaqty yntymaqtastyqty kúsheıtý jáne logıstıkalyq jobalardy jedeldetý qajettigin atap ótti. Onyń aıtýynsha, Shahıd Radjaı porty aýmaǵynda Qazaqstannyń logıstıkalyq jáne tranzıttik termınalyn salý jobasy aıaqtalý satysynda.
Sonymen qatar Iran tarapy Chabahar jáne Hoshk-e Aprın porttary arqyly Qazaqstannyń eksporttyq áleýetin keńeıtýge múmkindik bar ekenin málimdedi. Mınıstr Irannyń geografııalyq ornalasýy Qazaqstan úshin halyqaralyq naryqtarǵa shyǵýda tıimdi tranzıttik baǵyt ekenin atap ótti.
Qazaqstannyń Saýda jáne ıntegratsııa mınıstri Arman Shaqqalıev eki el arasyndaǵy saýda-ekonomıkalyq yntymaqtastyqtyń strategııalyq mańyzyn atap ótip, ózara saýda kólemin ulǵaıtýǵa arnalǵan jol kartasy daıyndalǵanyn jetkizdi. Onyń aıtýynsha, qazaqstandyq jeke sektor Iran porttarynda birlesken jobalardy iske asyrýǵa daıyn.
Toqaev TMU elderiniń joǵary sot tóraǵalaryn qabyldady — TRT
Memleket basshysy Qasym-Jomart Toqaev Aqordada Túrki memleketteri uıymyna múshe elderdiń joǵary sot organdarynyń tóraǵalaryn qabyldady. Kezdesý TMU Joǵary sottarynyń 2-konferentsııasy aıasynda ótti.
Bul týraly osy aptada Túrkııa Radıo Televızııa portaly habarlady.
«TRT»-nyń dereginshe, Prezıdent Túrki memleketteri uıymynyń óńirlik yntymaqtastyqty nyǵaıtýdaǵy rólin atap ótip, sot jáne quqyq qorǵaý salalaryndaǵy ózara is-qımyldyń mańyzyna toqtaldy. Onyń aıtýynsha, joǵary sottar arasyndaǵy baılanysty tereńdetý baýyrlas halyqtardyń ortaq múddesine qyzmet etedi. Sonymen qatar sot júıesin tsıfrlandyrý baǵytyndaǵy yntymaqtastyqty kúsheıtý qajettigi aıtyldy.
Qasym-Jomart Toqaev konferentsııa barysynda sot júıesin tsıfrlandyrý, ınvestorlardyń quqyqtaryn qorǵaý jáne ózekti quqyqtyq máseleler talqylanatynyn atap ótti. Onyń pikirinshe, mundaı pikir almasýlar TMU-nyń damýyna jáne halyqaralyq bedeliniń artýyna yqpal etedi.
Sondaı-aq TRT-da «Balalardyń ınternet qaýipsizdigi: álemdik tájirıbe qandaı?» degen mazmundaǵy shaǵyn saraptamalyq maqala jaryq kórgen bolatyn. Sol maqalaǵa qysqasha sholý jasaı keteıik.
Túrkııalyq BAQ-tyń dereginshe, álemniń kóptegen eli balalardyń áleýmettik jelilerge táýeldiliginiń aldyn alý maqsatynda tsıfrlyq platformalarǵa qoıylatyn talaptardy kúsheıtip jatyr. Aýstralııa, Ulybrıtanııa, Frantsııa jáne basqa memleketter jas shekteýlerin engizip, balalardyń ınternettegi qaýipsizdigin qamtamasyz etýge baǵyttalǵan zańnamalyq sharalardy qolǵa aldy.
Sarapshylar áleýmettik jelilerdiń algorıtmderi balalardyń nazaryn uzaq ýaqyt ustap turýǵa beıimdelgenin aıtady. Zertteýler áleýmettik jelilerdi shamadan tys paıdalanýdyń mazasyzdyq, depressııa, uıqynyń buzylýy jáne zeıinniń tómendeýi sııaqty psıhologııalyq máselelerge áser etýi múmkin ekenin kórsetedi.
Osyǵan baılanysty elder balalardan derekter jınaýdy shekteý, maqsatty jarnamalarǵa tyıym salý jáne algorıtmderdiń ashyqtyǵyn arttyrý baǵytynda jumys júrgizýde. Túrkııada da balalardy tsıfrlyq qaýip-qaterden qorǵaýǵa arnalǵan jańa zańnamalyq bastamalar talqylanyp, jaýapkershilikti ata-analarmen qatar tsıfrlyq platformalarǵa júkteý máselesi kóterilýde.
