Balalardyń derekterin paıdalanyp, 65,9 mln teńgeni zańsyz alǵan stomatologııa basshysy sottaldy
ASTANA. KAZINFORM — Almaty oblysynda mindetti áleýmettik medıtsınalyq saqtandyrý qarajatyn zańsyz ıemdený faktisi anyqtaldy.
Eki jeke stomatologııalyq klınıkanyń basshysy týa bitken patologııasy bar balalarǵa kórsetilmegen medıtsınalyq qyzmetterdi aqparattyq júıege engizip, memleketten 65,9 mln teńge alǵan.
Almaty oblysy prokýratýrasynyń málimetinshe, klınıka basshysy patsıentterdiń derbes derekterin paıdalanyp, balalarǵa ortodontııalyq qyzmetter kórsetildi degen jalǵan málimet engizgen. Sonyń negizinde MÁMS qorynyń qarajatynan medıtsınalyq uıymdarǵa zańsyz tólemder aýdarylǵan.
— Prokýrorlyq tekserý nátıjesinde atalǵan fakti boıynsha QR Qylmystyq kodeksiniń 190-baby 4-bóligi 2) tarmaǵymen qylmystyq is tirkeldi. Sot úkimimen kináli tulǵa sottaldy. Memleketke keltirilgen 65,9 mln teńge kólemindegi zalal tolyq óteldi, — dep habarlady Almaty oblysynyń prokýratýrasy.
Eske salaıyq, buǵan deıin Densaýlyq saqtaý mınıstri Aqmaral Álnazarova balalar stomatologııasyndaǵy kezek máselesin sheshýdi talap etkenin jazǵanbyz.
