Balalardyń densaýlyǵyn qorǵaý úshin qandaı mańyzdy sheshimder qabyldandy
ASTANA. KAZINFORM — Qazaqstan balalardyń ál-aýqaty ındeksiniń «Densaýlyq» baǵyty boıynsha álemniń úzdik 30 eliniń qataryna kirdi. Bul týraly Úkimet otyrysynda Densaýlyq saqtaý mınıstri Aqmaral Álnazarova aıtty.
- Balalardyń densaýlyǵy – memleket saıasatynyń basty basymdyqtarynyń biri. Osy baǵytta «Qazaqstan balalary» tujyrymdamasynyń jobasynda negizgi eki kórsetkish belgilengen. Atap aıtqanda, profılaktıkalyq tekserýler men patronajdar arqyly qamtylatyn balalardyń úlesin 66 paıyzǵa jáne densaýlyq saqtaý nysandarynyń tozý deńgeıin kezeń-kezeńimen 30 paıyzǵa deıin tómendetý kózdelgen. Osyǵan sáıkes atalǵan ındıkatorlarǵa qol jetkizý úshin mınıstrliktiń aldynda 30 is-sharany iske asyrý mindeti tur, - dedi ol.
Mınıstrdiń aıtýynsha, búginde Qazaqstan balalardyń ál-aýqaty ındeksiniń «Densaýlyq» baǵyty boıynsha álemniń úzdik 30 eliniń qataryna kirip otyr. Balalardyń densaýlyǵyn qorǵaý men ómir sapasyn arttyrý úshin naqty ári mańyzdy sheshimder de qabyldandy.
- Atap aıtar bolsaq: alǵash ret estý qabileti buzylǵan, biraq múgedektik mártebesi joq balalar estý apparattary men aýdıoprotsessorlarmen qamtamasyz etilýde. Ol birneshe jyldan beri ata-analar tarapynan qozǵalyp kelgen túıtkildi sheshimderdiń biri. Dál osylaı alǵash ret bet qańqasy men basynyń týa bitken anatomııalyq aqaýlary bar balalarǵa genetıkalyq skrınıngter, rekonstrýktıvtik jáne plastıkalyq operatsııalar júrgizý de zańmen bekitildi. Nátıjesinde kúrdeli dıagnozdar erte anyqtalyp, múgedektiktiń aldyn alýǵa jol ashylady. Keratoplastıka boıynsha transplantatsııalaý tizbesi de keńeıtildi, - dedi Aqmaral Álnazarova.
Sonymen qatar ol byltyrdan bastap densaýlyq saqtaý uıymdarynda 3 táýlikke deıin ata-anasynyń qamqorlyǵynsyz qalǵan balalardy emdeýge jatqyzýǵa múmkindik kózdeldi.
- Balalardyń ýaqytsha qozǵalysy shektelgen kezeńderde kómekshi tehnıkalyq quraldardy alýyna, kámeletke tolmaǵan týysqan donordan súıek kemigin transplanttaýǵa, sondaı-aq em alý úshin basqa óńirge shyqqanda jol júrý shyǵyndaryn óteýge qatysty jańa zańnamalyq normalar búginde Májilistiń qaraýynda, - dedi mınıstr.
Aıta keteıik, Úkimet «Qazaqstan balalary» tujyrymdamasyn pysyqtap jatyr.