Balalardyń demalysyn uıymdastyrýǵa arnalǵan «BalaCamp.kz» portaly iske qosylady
ASTANA. KAZINFORM – 2027 jyly 3 óńirde bilim berý-saýyqtyrý qyzmetterin jan basyna shaqqandaǵy qarjylandyrý tetigi pılottyq rejım engiziledi. Bul týraly Májilis depýtattarynyń saýalyna Premer-mınıstrdiń orynbasary – Ulttyq ekonomıka mınıstri Serik Jumanǵarınniń jaýabynda aıtylǵan.
- Respýblıkada 100-den astam jekemenshik balalarǵa arnalǵan bilim berý-saýyqtyrý ortalyǵy jumys isteıdi. Atalǵan ortalyqtar jyl saıyn memlekettik satyp alý aıasynda jergilikti bıýdjet esebinen, sondaı-aq «Qazaqstan halqyna» QQ-nyń qoldaýymen «Jazdyq joldama» jobasy arqyly qarjylandyrylatyn kvotalar (joldamalar) alady, - dedi Serik Jumanǵarın.
Vıtse-premerdiń sózine qaraǵanda, bıýdjet qarajatyn tıimdi paıdalaný maqsatynda 2027 jyly 3 óńirde (Pavlodar, Qostanaı jáne Aqmola oblystarynda) bilim berý-saýyqtyrý qyzmetterin jan basyna shaqqandaǵy qarjylandyrý tetigin pılottyq rejımde engizý kózdelgen.
- Sonymen qatar, jekemenshik bilim berý-saýyqtyrý ortalyqtaryn qoldaýdyń qosymsha sharalary «Damý» qorynyń jeńildetilgen nesıelendirý tetikteri, materıaldyq-tehnıkalyq bazany jańǵyrtý arqyly pysyqtalady. Ulttyq bilim berý platformasynyń bazasynda balalardyń demalysy men saýyqtyrylýyn uıymdastyrýǵa arnalǵan «BalaCamp.kz» biryńǵaı tsıfrlyq portalyn iske qosý josparlanǵan, - dedi ol.
Buǵan deıin bıyl 1 sáýirden bastap kámeletke tolmaǵandarǵa bilim berý-saýyqtyrý qyzmetterin usynatyn uıymdar lıtsenzııalaýdan ótetinin jazǵan edik.
Aıta keteıik, taıaýda Májilis depýtaty Nurgúl Taý balalar lagerlerin lıtsenzııalaýdy 2026 jyldyń jazyna deıin tolyq engizý máselesin kótergen bolatyn.