Balalardyń býllıng pen sýıtsıdtik nıetin anyqtaıtyn júıe ázirlendi – Premer-mınıstr
ASTANA. KAZINFORM – Balalardyń býllıng pen sýıtsıdtik nıetin anyqtaıtyn júıe ázirlendi. Bul týraly Quryltaı depýtattarynyń saýalyna Premer-mınıstr Oljas Bektenovtiń jaýabynda aıtylǵan.
Úkimet basshysynyń atap ótýinshe, kámeletke tolmaǵandardyń densaýlyǵyna tsıfrlyq ortanyń áserin júıeli zerdeleý máselesi «Qazaqstan balalary» tujyrymdamasynda kózdelgen. Tujyrymdamany iske asyrý aıasynda Bala quqyqtary jónindegi ýákilmen birlesip Balazhan dıagnostıkalaýdyń aqparattyq júıesi ázirlengen.
- Júıege bilim berý uıymdarynyń bilim alýshylary men tárbıelenýshileriniń boıynan zorlyq-zombylyq, qorqytý (býllıng), sýıtsıdtik nıet jáne taǵy basqa belgilerdi anyqtaý úshin Oqý-aǵartý mınıstrligi usynǵan dıagnostıkalyq ádister biriktirilgen. ıagnostıkalyq ádistemelerge tsıfrlyq ortadaǵy balalardyń psıhologııalyq qaýipsizdik deńgeıin baǵalaýǵa, psıhologııalyq qysym kórip júrgen balalardy ýaqtyly anyqtaýǵa jáne olarǵa qajetti psıhologııalyq kómek kórsetýge arnalǵan saýalnamalar engizilgen, - dedi ol.
Oljas Bektenov Memleket basshysynyń tapsyrmasyna sáıkes óńirlerde qurylǵan psıhologııalyq qoldaý ortalyqtary jumys istep jatqanyn aıtady. Atalǵan ortalyqtar bilim berý uıymdarynyń psıhologııalyq qyzmetterin úılestiredi, ádistemelik súıemeldeýdi qamtamasyz etedi jáne oqýshylar men ata-analarǵa keńes beredi.
Aıta keteıik, elimizde onlaın-platformany paıdalanýshylardyń jasyn rastaýdyń arnaıy qaǵıdalary ázirlenedi.
