«Balalardyń beti kógergen»: Óskemende balabaqsha tárbıeshisine qatysty qylmystyq is qozǵaldy

ÓSKEMEN. KAZINFORM – Óskemen qalasynda balalarǵa dórekilik tanytqan tárbıeshiniń vıdeosy jelige tarap ketti.

Ata-analar vıdeoda tárbıeshiniń balalardy ıterip jatqanyn, keıbir balalardyń betinde kógergen izder baıqalǵanyn aıtyp jatyr. 

- Tárbıeshi balalarǵa qatal qaraǵan. Oıynshyqtardy ózimiz satyp alyp bersek te, olarmen oınatpaǵan. Eger jylasa, olardy kúshpen ıterip jibergen. Bir kadrda uıqysy kelip otyrǵan ulymdy dárethanaǵa jetektep aparyp, ishinen balam malmandaı sý bolyp shyqqanyn kórdim. Basqa bir balanyń beti kógergen. Osy balanyń anasy vıdeony kórsetýdi talap etti. Biz osy jaǵdaılarǵa beıjaı qaraı almaı polıtsııaǵa habarlastyq. Biraq eshqandaı keri baılanys bolmady. Al bizdiń aryzymyzǵa basshylyq nazar aýdarmady. Tipti keshirim de suramady. Ulymda da kógergen izder bar. Osydan keıin jýrnalısterge habarlasýǵa týra keldi, - dedi balalardyń biriniń anasy Dana Kabdýllına.

Al bul balabaqsha joǵary sanatqa jatady. Ata-analar aı saıyn 70 myń teńge tóleıdi. Basshylyq barlyq tárbıeshilerdiń joǵary bilimi men mol tájirıbesi bar ekenin aıtqan. Alaıda kináli tárbıeshi arnaıy orta bilimdi bolyp shyqty

ShQO Bilim basqarmasy janjaldan keıin tárbıeshini jumystan bosatyp, materıaldardy quqyq qorǵaý organdaryna tapsyrǵanyn habarlady. Qalalyq Polıtsııa basqarmasy qylmystyq is qozǵalǵanyn jáne tergeý júrgizilip jatqanyn rastady.

Biraq ata-analar balabaqsha basshylyǵynyń jaýapkershilikke tartylmaıtynyn, al jumystan shyǵarylǵan tárbıeshiniń basqa balabaqshaǵa ornalasýy múmkin ekendigine alańdaıdy.

Buǵan deıin Atyraýda 5 jasar balany tepken tárbıeshige 314,5 myń teńge aıyppul salynǵany habarlanǵan.