Balalardyń áleýmettik jelidegi akkaýnttaryna qatysty jańa tártip engizilmek
ASTANA. KAZINFORM – Elimizde onlaın-platformany paıdalanýshylardyń jasyn rastaýdyń arnaıy qaǵıdalary ázirlenedi. Bul týraly Quryltaı depýtattarynyń saýalyna Premer-mınıstr Oljas Bektenovtiń jaýabynda aıtylǵan.
- Úkimet qoldanystaǵy Zańǵa on alty jasqa deıingi paıdalanýshylardy onlaın-platformalarda tirkeýdi retteýge baılanysty túzetýler ázirledi. Qazirgi tańda túzetýler Qazaqstan Respýblıkasy Quryltaıynyń qaraýynda. Zańnamalyq túzetýler qabyldanǵannan keıin onlaın-platformany paıdalanýshylardyń jasyn rastaýdyń arnaıy qaǵıdalary ázirlenedi. Ázirleý barysynda onlaın-platformalardyń qoldanylyp júrgen tetikteri, jasandy ıntellekt kómegimen sáıkestendirý, qaralatyn kontent pen paıdalanýshynyń belsendiligi eskeriledi. Búgingi tańda onlaın-platformalarda tıisti tehnologııalyq múmkindikter bar, - dedi Úkimet basshysy.
Premer-mınıstrdiń atap ótýinshe, jańa talaptardyń sapaly oryndalýyn qamtamasyz etý maqsatynda atalǵan normany qoldanysqa engizý úshin ótpeli kezeń kózdeledi.
- On alty jasqa deıingi onlaın-platformany paıdalanýshylardyń qoldanystaǵy akkaýnttaryn ýaqytsha toqtatý qaralatyn bolady. Normatıvtik quqyqtyq akt Qazaqstan Respýblıkasynyń aýmaǵyndaǵy onlaın-platformalardyń ókildikterimen birlesip talqylanady. Usynylatyn tásilder paıdalanýshynyń jeke derekteriniń taralýyna jol bermeý negizinde onyń jasyn rastaý qaǵıdatyna negizdeledi. Sol arqyly balalardyń tsıfrlyq keńistiktegi quqyqtary men zańdy múddeleri qorǵalyp, kámeletke tolmaǵandar úshin qaýipsiz tsıfrlyq orta qalyptastyrylady. Qazaqstan Respýblıkasy Quryltaıynyń depýtattarymen jumys toptarynda talqylaý kezinde tıisti shekteýdi naqty iske asyrý tetikteri egjeı-tegjeıli pysyqtalatyn bolady,- dedi Oljas Bektenov.
Buǵan deıin Quryltaı balalardyń áleýmettik jelige tirkelýine shekteý qoıý tetigin naqtylaý máselesin kótergenin jazǵan edik.
