Balalardyń 34%-y óz akkaýnttarynda dóreki habarlamalar alǵan — zertteý
ASTANA. KAZINFORM — 5-8 jas aralyǵyndaǵy balalardyń 40 paıyzy kún saıyn bos ýaqytyn ǵalamtorda ótkizedi.
Bul týraly elordada bala tárbıesine jónindegi halyqaralyq konferentsııa qatysýshylaryna arnalǵan quttyqtaý hatynda QR Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraǵasy, Mádenıet jáne aqparat mınıstri Aıda Balaeva málim etti.
Atap aıtqanda, mınıstrdiń sózin forýmda QR Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa tóraǵasynyń orynbasary Lázzat Súleımen oqyp berdi.
— «Kazakhstan Kids online» (ıÝNISEF 2023) zertteýine sáıkes, 5-8 jas aralyǵyndaǵy qazaqstandyq balalardyń 40 paıyzy kún saıyn bos ýaqytyn ınternette ótkizedi. Bul kórsetkish ǵalamtordyń keńinen damýy aıasynda aldaǵy ýaqytta arta túsýi múmkin. Bankter balalarǵa tsıfrlyq qyzmetter men banktik kartalardy belsendi túrde usyna bastady. Osy jaǵdaı balalar men jasóspirimderdiń onlaın-alaıaqtyqqa tap bolýy qaýpin arttyrady, — dedi A. Balaeva.
Sarapshylardyń málimetinshe, áleýmettik jelilerdegi balalar akkaýntarynyń 44 paıyzy ashyq ekeni anyqtalǵan. Balalardyń 15,3 paıyzy kún saıyn ınternette ózderin renjitetin derekterdi kezdestiretinin, sondaı-aq jetkinshekterdiń 34,5 paıyzy óz akkaýnttarynda dóreki nemese til tıgizetin habarlamalar alǵanyn atap ótken.
Zertteýge sáıkes, balalardyń tek 4,8% paıyzy ǵana ata-analaryna problemalar týraly habarlaǵan, al qaıǵyly jaǵdaılardyń kópshiligi ata-analarymen durys til tabysa almaýynyń saldary sanalady.
— Osyǵan baılanysty salalyq baǵdarlamalarǵa jaýapty ata-ana faktory engizilýi tıis, — dedi Áıelder isteri jáne otbasylyq-demografııalyq saıasat jónindegi ulttyq komıssııanyń tóraǵasy.
Budan buryn habarlanǵandaı, elordada balalar men jastar tárbıesine arnalǵan halyqaralyq konferentsııa ótip jatyr.