Balalardy urǵan pavlodarlyq tárbıeshige qatysty qylmystyq is qozǵaldy
PAVLODAR. KAZINFORM — Áleýmettik jelide Pavlodardaǵy balabaqshanyń birinde balalardy shashynan julqyp, shapalaqpen uryp jatqan áıel adamnyń beınejazbasy tarap ketti.
Atalǵan vıdeony balabaqshanyń ata-analary beınebaqylaý kameralarynan túsirip alǵan. Álgi jazbada áıel adamnyń búldirshinderdi shapalaqpen betinen uryp, shashynan, qolynan julqylap jatqanyn kórýge bolady.
Beınejazba № 116 balabaqshadan túsirilgeni kórsetilgen. Atalǵan jazba jaryq kórisimen oqıǵa ornyna bala quqyqtary jónindegi óńirlik ýákil Sáýle Shákeneva baryp, balalarǵa qatygezdik kórsetý deregin anyqtaýǵa kirisken. Al polıtsııa vıdeoda balalardy uryp-soqqan áıel adamǵa qatysty qylmystyq is qozǵalǵanyn habarlady.
— Kámeletke tolmaǵan balany tárbıeleý jónindegi mindetterdi oryndamaǵan adamǵa qatysty qylmystyq is qozǵaldy. Oqıǵanyń mán-jaıy men sebepteri tergeý barysynda anyqtalatyn bolady. Sondaı-aq, balabaqsha basshylyǵynyń is-áreketterine quqyqtyq baǵa beriledi, — dep málimdedi óńirlik polıtsııa departamentiniń baspasóz qyzmetinen.
Al qalalyq bilim berý bólimi № 116 sábıler baqshasyndaǵy tárbıeshiniń balalarǵa qol kóterý deregi beınejazbalarmen rastalǵanyn habarlady.
— Bilim berý bólimi qyzmettik tekseris júrgizip jatyr, onyń nátıjesinde sábıler baqshasy men tárbıeshige qatysty qoldanystaǵy zańnamaǵa sáıkes eń qatań sharalar qabyldanady, — dep habarlady bilim berý bóliminen.
Eske sala keteıik, Jezqazǵanda 3 jasar balany urǵan tárbıeshige qatysty sot úkimi shyqty.