Balalardy urǵan pavlodarlyq tárbıeshi jumystan bosatyldy
PAVLODAR. KAZINFORM - Sábıler baqshasyndaǵy balalarǵa asqan qatygezdik kórsetken tárbıeshiniń ústinen polıtsııaǵa 10 ata-ana shaǵym túsirgen.
Óńirlik balalar ombýdsmeni Sáýle Shákenova tárbıeshiden japa shekken balalardyń barlyǵy sot-saraptamalyq saraptamadan ótkenin málimdedi. Qylmystyq istiń materıaldary Polıtsııa departamentiniń anyqtaý basqarmasyna túsken.
- Mekemeden alynǵan barlyq vıdeomaterıaldardy zertteý jalǵasyp jatyr. Tárbıeshiden japa shekken balalardyń sany kóbeıe túsýi múmkindigin joqqa shyǵarmaımyn. Kúdikti eshqaıda shyqpaý týraly qolhat jazyp berdi ári ol jumys ornynan shyǵaryldy, - dep habarlady bala quqyqtary jónindegi óńirlik ýákil Sáýle Shákenova.
Buǵan qosa balabaqsha meńgerýshisi qatań sógis alǵany aıtylyp otyr.
Al japa shekkender arasynda eki balanyń ata-anasy óńirlik qoldaý ortalyǵyna psıhologııalyq kómek alý úshin júgingen.
Eske sala keteıik, áleýmettik jelide Pavlodardaǵy balabaqshanyń birinde balalardy shashynan julqyp, shapalaqpen uryp jatqan áıel adamnyń beınejazbasy tarap ketti. Polıtsııa atalǵan oqıǵa boıynsha qylmystyq is qozǵalǵanyn málimdegen.