Balalardy sport jarystaryna polıtsııanyń súıemeldeýinsiz jiberýge tyıym salynady

ASTANA. KAZINFORM – Premer-mınıstr Oljas Bektenov sportshy oqýshylar mingen kólikterdiń jol apatyna túsý jaǵdaıyna alańdaýshylyq tanytty.

- Іshki ister mınıstrligi qoǵamdyq tártipti saqtaýdy qamtamasyz etý úshin árbir balalar ortalyǵy men lagerine, kópshilik is-sharalar ótetin oryndarǵa ýchaskelik polıtsııa ınspektorlaryn bekitýge tıis. Balalardyń jol-kólik jaraqatynyń profılaktıkasy máselesine erekshe nazar aýdarý kerek. Sportshy oqýshylar mingen kólikterdiń jol apatyna túsip, qaıǵyly jaǵdaılarǵa alyp kelgeni barshaǵa aıan. Sondyqtan tıisti kelisýler, ruqsattar bolmasa jáne patrýldik polıtsııa bastap júrmese, sportshy balalardyń óz eldi mekenderinen tys jerlerge shyǵýyna jol bermeýdi tapsyramyn. Іshki ister mınıstrligi, Tótenshe jaǵdaılar mınıstrligi, Oqý-aǵartý mınıstrligi jáne Densaýlyq saqtaý mınıstrligi men óńir ákimdikteri kanıkýl kezinde barlyq qyzmettiń úzdiksiz jumysyn qamtamasyz etýi qajet, - dedi Oljas Bektenov Úkimet otyrysynda. 

Osy oraıda Premer-mınıstr 1 maýsymǵa deıin barlyq uıymdastyrý jumysyn aıaqtaýdy tapsyrdy. 

- Jalpy, múddeli memlekettik organdar jazǵy maýsym aldynda sý aıdyndarynda, ormandar men joldardaǵy qaýipsizdik jáne tártip erejeleri boıynsha keń aýqymdy túsindirý jumystaryn júrgizsin, - deıdi ol. 

Buǵan deıin Oljas Bektenov mektep bitirý keshinde balalardyń qaýipsizdigine erekshe nazar aýdarý qajettigin aıtty.

Sondaı-aq Úkimet basshysy balalardy sýda jáne órt kezinde qutqarý daǵdylaryna úıretý qajettigine toqtaldy.