Balalardy skrınıngpen qamtý 90 paıyzdan asty - mınıstr
ASTANA. KAZINFORM – Balalardyń densaýlyq jaǵdaıyna qatysty skrınıngtiń 6 túri bar. Bul týraly Úkimet otyrysynda ınklıýzıvti saıasatty júzege asyrý sharalaryn talqylaý kezinde Densaýlyq saqtaý mınıstri Aqmaral Álnazarova málim etti.
- Inklıýzıvti ortany qalyptastyrý maqsatynda densaýlyq saqtaýdy damytý tujyrymdamasynda medıtsınalyq kómekke qoljetimdiliktegi teńsizdikti azaıtý jáne sapasyn arttyrý, ıntegratsııalanǵan tásildi jáne tsıfrlyq quraldardy engizý jónindegi sharalar qarastyrylǵan. Qabyldanyp jatqan júıeli sharalar múmkindigi shekteýli adamdardyń ómir súrý sapasyn jaqsartýǵa, múgedektik pen ólim-jitimdi tómendetýge múmkindik beredi. Balalardyń densaýlyq jaǵdaıyna qatysty skrınıngtiń 6 túri, onyń ishinde úsheýi perzenthanalarda (prenataldyq, neonataldyq, aýdıologııalyq) júrgiziledi. 2025 jyldyń qorytyndysymen balalardy skrınıngpen qamtý 25%-ǵa artyp 93% boldy. Aýdıologııalyq skrınıng nátıjesinde anyqtalǵan tolyq estý qabileti joq barlyq 523 balaǵa quny 6 jarym mln teńgeni quraıtyn estý ımplanttary ornatyldy. Eki jyl buryn mundaı operatsııalardyń 80%-y 3 jasta jasalsa, qazir 2 jasqa deıin jasalady. Bul balardyń erte sóıleý qabiletin qalyptastyrýǵa jáne erte damýyna úles qosady, - dedi A.Álnazarova.
Sonymen qatar mınıstr oftalmoskrınıng nátıjesinde kózderinde aqaý anyqtalyp, operatsııany qajet etken barlyq shala týǵan 721 nárestege ýaqytyly em júrgizilip, kórý qabileti saqtalǵanyn aıtty.
- Sondaı-aq qabyldanǵan sharalardyń nátıjesinde júkti áıelderdi skrınıngpen qamtý 9%-ǵa, anyqtalý kórsetkishi 12%-ǵa ósti, al týa bitken damý aqaýlarynan bolatyn múgedektik deńgeıi 7%-ǵa tómendedi. Sońǵy eki jylda pedıatrııalyq qyzmetti kúsheıtý erekshe nazarda. Byotyr emhanalarda 372 damý ári erte aralasý ortalyǵy jáne 366 pedıatrııalyq bólimshe ashyldy, bul qajettiliktiń 80%-y. Jyl sońyna deıin qalǵan oblystardyń barlyǵynda ashylady. Nátıjesinde, pedagogıkalyq túzetýge jiberilý 2 esege ósip, 85 myń bala qarqyndy baqylaýda, - dedi vedomstvo basshysy.
Budan buryn habarlanǵandaı, bıyl ınklıýzıvti jumyspen qamtý múmkindigi keńeıtiledi.