Balalardy shetelge kardıohırýrgııalyq emge joldaý 5,2 ese qysqardy

ASTANA. KAZINFORM — Bıyl elimizde protondyq, ıodterapııa jáne tamyrly aqaýlardy emdeý tolyq qoljetimdi bolady. Bul týraly Úkimet otyrysynda Densaýlyq saqtaý mınıstri Aqmaral Álnazarova aıtty.

- Buryn tek eresekterge jasalyp kelgen «gamma-pyshaq» apparatyndaǵy radıohırýrgııalyq operatsııalar endi balalarǵa da júrgizile bastady. Ol kúrdeli mı isikteri men basqa da qaýipti dıagnozdardy ashyq operatsııasyz, qaýipsiz ári dál emdeýge múmkindik beredi. 400 balaǵa estý ımplanttary ornatylyp, olar alǵash ret dybysty estip, sóıleý qabiletin damytý múmkindigine ıe boldy, - dedi mınıstr.

Onyń dereginshe, jyl saıyn orta eseppen 700 shala týǵan nárestege retınopatııany túzetý júrgiziledi. Sonymen qatar jyl saıyn 2 myńnan astam balaǵa kardıohırýrgııalyq operatsııalar jasalyp, júrek aqaýlary der kezinde túzetilip otyrady.

- Osylaısha, joǵary tehnologııalyq medıtsınalyq qyzmetterdiń engizilýi balalardyń ómir sapasyn jaqsarta otyryp, sońǵy úsh jylda shetelge týys emes donordan baǵanaly jasýshalardy transplantatsııalaýǵa balalardy jiberý 3 ese, al kardıohırýrgııalyq emge joldaý 5,2 ese qysqardy jáne de bul qadamdar balalar arasyndaǵy múgedektik deńgeıin 11 paıyzǵa tómendetýge múmkindik berdi. Bıyl elimizde protondyq, ıodterapııa jáne tamyrly aqaýlardy emdeý tolyq qoljetimdi bolady, - dedi Aqmaral Álnazarova.

Buǵan deıin balalardyń densaýlyǵyn qorǵaý úshin qandaı mańyzdy sheshimder qabyldanǵanyn jazǵan edik.