Balalardy psıhologııalyq dıagnostıkalaý boıynsha biryńǵaı tsıfrlyq platforma qurylady
ASTANA. KAZINFORM – «Qazaqstan balalary» 2026–2030 jyldarǵa arnalǵan tujyrymdamasyn iske asyrý aıasynda elimizde balalardy psıhologııalyq dıagnostıkalaý jáne súıemeldeý boıynsha biryńǵaı tsıfrlyq platforma qurylady. Bul týraly Oqý-aǵartý mınıstrligi habarlady.
Joba qaýip-qaterlerdi erte anyqtaýǵa, psıhologııalyq kómektiń qoljetimdiligin arttyrýǵa jáne balany qorǵaý júıesinde pedagog-psıhologtardyń rólin kúsheıtýge baǵyttalǵan.
Jańa platforma psıhologııalyq jáne minez-qulyqtyq táýekelderdi júıeli túrde anyqtaýǵa, balanyń psıhoemotsııalyq jaǵdaıynyń dınamıkasyn baqylaýǵa, sondaı-aq qoldaýdy qajet etetin balalardy úzdiksiz ári nysanaly túrde súıemeldeýdi qamtamasyz etýge múmkindik beredi. Protsesterdi tsıfrlandyrý balaǵa kórsetiletin kómektiń biryńǵaı baǵytyn qalyptastyrýǵa, vedomstvolar arasyndaǵy fýnktsııalardyń qaıtalanýyn boldyrmaýǵa jáne mamandarǵa túsetin kásibı júktemeni azaıtýǵa jaǵdaı jasaıdy.
Jalpy alǵanda, «Qazaqstan balalary» tujyrymdamasy pedagog-psıhologtar ınstıtýtyn jáne balalardyń psıhologııalyq qaýipsizdigi júıesin keshendi túrde nyǵaıtýdy kózdeıdi.
Atap aıtqanda, kelesi sharalardy iske asyrý josparlanyp otyr:
•bilim berý uıymdarynda balalardyń áleýmettik-emotsııalyq daǵdylaryn damytýǵa baǵyttalǵan pedagog-psıholog saǵatyn engizý;
•zorlyq-zombylyqtan zardap shekken balalarǵa arnalǵan kómek kabınetterin ashý;
•el boıynsha pedagog-psıhologtarǵa arnalǵan biryńǵaı kásibı standarttar men biliktilik talaptaryn qaıta qaraý;
•daǵdarystyq jaǵdaılarmen jáne tsıfrlyq táýekeldermen jumys isteýdi qosa alǵanda, qazirgi zaman talaptaryn eskere otyryp, mamandardyń biliktiligin mindetti túrde arttyrý;
•keıs-menedjment ınstıtýtyn damytý, bul rette pedagog-psıholog bala men otbasyn keshendi súıemeldeýdiń negizgi qatysýshysyna aınalady;
•vedomstvoaralyq ózara is-qımyl sheńberinde, onyń ishinde qylmystyq protsess aıasynda, zardap shekken balalar men zorlyq-zombylyqtyń kýágerlerin súıemeldeýde psıhologtardyń mindetti túrde qatysýyn qamtamasyz etý.
Atalǵan is-sharalardy iske asyrý núktelik áreketterden júıeli profılaktıkaǵa kóshýge, pedagog-psıhologtardyń mártebesi men kásibı turaqtylyǵyn arttyrýǵa, sondaı-aq turǵylyqty óńirine qaramastan árbir balaǵa ýaqtyly, kásibı jáne úzdiksiz psıhologııalyq kómek kórsetýdi qamtamasyz etýge múmkindik beredi.
Aıta keteıik, elimizde balalardy shetelge kardıohırýrgııalyq emge joldaý 5,2 ese qysqardy.