Balalardy órtten qutqarǵan áskerı qyzmetshi Ǵazız Baıtasov atyndaǵy medal aldy
ASTANA. KAZINFORM — Eki balanyń ómirin saqtap qalǵan ulandyq Respýblıka kúni qarsańynda marapatqa ıe boldy.
Respýblıka kúni qarsańynda Іshki ister mınıstrliginde jáne Ulttyq ulannyń 5573 elordalyq brıgadasynda merekelik is-sharalar ótti. Saltanatty shara barysynda áskerı qyzmetshiler men polıtsııa qyzmetkerlerine memlekettik nagradalar tabystaldy. Tabystaý rásimderi — batyldyqty, janqııarlyq pen qyzmettik boryshqa adaldyqty moıyndaý boldy.
Іshki ister mınıstrliginde memlekettik nagradalardy vedomstvo basshysy polıtsııa general-leıtenanty Erjan Sádenov tapsyrdy. Іshki ister mınıstri quttyqtaý sózinde quqyq qorǵaýshylardyń qazirgi urpaǵy ant pen Otanǵa adaldyq tanyta otyryp, aǵa býynnyń ıgi dástúrlerin laıyqty túrde jalǵastyratynyn atap ótti.
Marapatqa ıe bolǵandardyń biri — 5517 áskerı bóliminiń bólimshe komandıri efreıtor Armat Ábilǵalıev. Ol 2026 jyldyń mamyr aıynda Qazaqstan Prezıdenti taǵaıyndaǵan «Ǵazız Baıtasov» atyndaǵy medalmen Ulttyq ulannyń áskerı qyzmetshileri arasynda alǵash ret marapattalyp otyr. Áskerı qyzmetshi órtenip jatqan páterge kirip, eki balany qaýipsiz jerge der kezinde alyp shyqqan.
Sondaı-aq, polkovnık Shýhratbek Halbaev «Eren eńbegi úshin» medalimen marapattaldy. Al aǵa serjant Baýyrjan Marınbaev, podpolkovnık Baqyt Tashkenbaev jáne efreıtor Sharapat Saǵynovqa «Jaýyngerlik erligi úshin» medali berildi. Olardyń árqaısysy qyzmettik mindetterin oryndaý kezinde, sondaı-aq adamdarǵa kómek qajet bolǵan jaǵdaılarda kásibı sheberlik pen tabandylyq tanytqan.
Іshki ister mınıstriniń jáne Іshki ister mınıstriniń orynbasary — Ulttyq ulan Bas qolbasshysynyń buıryqtarymen birqatar áskerı qyzmetshiler men polıtsııa qyzmetkerleri nagradalarǵa usynyldy. Sonymen qatar, qyzmetimen erekshelengenderge kezekti áskerı ataqtar men gramotalar da tabys etildi.
Merekelik baǵdarlamany Ulttyq ulan Án-bı ansambliniń kontserti aıaqtady. Áskerı ónerpazdar patrıottyq ánder oryndap, Otanǵa, halyq birligi men Qazaqstanǵa degen súıispenshilikke baǵyttalǵan qoıylymdar usyndy.
Kontsert Respýblıka kúnimen quttyqtaýdyń mýzykalyq úlgisine aınaldy jáne is-sharanyń saltanatty atmosferasyn tolyqtyra tústi.
Buǵan deıin ánshi Rýhııa Baıdúkenova «Qurmet» ordenimen marapattalǵanyn jazǵanbyz.
