Balalardy ońaltý máseleleri boıynsha túsip jatqan shaǵymdar az emes – Úkimet basshysy
ASTANA. KAZINFORM – Búgin Úkimet otyrysynda 2026–2030 jyldarǵa arnalǵan «Qazaqstan balalary» tujyrymdamasy bekitildi.
- Sońǵy jyldary balalardyń sapaly medıtsınalyq kómek alý múmkindigi aıtarlyqtaı jaqsardy. Alaıda, mamandardyń, dárilik zattardyń jetispeýshiligine, balalardy ońaltý máseleleri boıynsha túsip jatqan shaǵymdar az emes. Erekshe bilim berý qajettilikteri bar balalardy qoldaýdyń birqatar jańa tetikteri engizildi. Biraq ony tıimdi iske asyrý úshin tıisti jaǵdaılar men arnaıy mamandar – defektologtar, logopedter, sýrdologtar qajet. Al bizde mundaı mamandar jetispeıdi, - dedi otyrysta Premer-mınıstr Oljas Bektenov.
Premer-mınıstr balalardyń, sonyń ishinde olardyń tsıfrlyq keńistiktegi qaýipsizdigin qamtamasyz etý máseleleri áli de ózekti ekenine nazar aýdartty.
- Kóptegen aýyl balalary úıirmeler men zamanaýı bilim berý tehnologııalarynan tys qalady. Jasóspirimderge tıisti kóńil bólinbeıdi ári olar ózin damytý úshin tyń múmkindikterden aıyrylyp otyr. Bul baǵytta júıeli túrde jumys júrgizip, Oqý-aǵartý, Densaýlyq saqtaý, Eńbek jáne áleýmettik qorǵaý, Іshki ister mınıstrlikteri men óńir ákimdikteri arasyndaǵy vedomstvoaralyq úılestirýdi kúsheıtý qajet. Tujyrymdamada («Qazaqstan balalary» tujyrymdamasy) kózdelgen nysanaly ındıkatorlar balalardy damytýdyń, qoldaý men qorǵaýdyń ornyqty júıesin qalyptastyrýǵa tıis, - dedi Oljas Bektenov.
Osydan keıin Mınıstr kabınetiniń músheleri tujyrymdamany bekitý týraly Úkimet qaýlysyna daýys berdi.
- Oqý-aǵartý mınıstrligi múddeli memlekettik organdarmen, ákimdiktermen birlesip, Tujyrymdamadaǵy barlyq is-sharalardyń sapaly ári ýaqtyly oryndalýyn qamtamasyz etsin. Bala quqyqtary jónindegi ýákilmen tıimdi ózara is-qımyldy jolǵa qoıý kerek. Oqý-aǵartý mınıstrligi Mádenıet jáne aqparat mınıstrligimen birlesip, «Qazaqstan balalary» tujyrymdamasyn iske asyrý boıynsha aqparattyq naýqandy uıymdastyryp, josparlanǵan is-sharalar men olardyń oryndalýy týraly halyqty ashyq ári túsinikti jolmen habardar etip otyrsyn, - dedi Oljas Bektenov.
Buǵan deıin Juldyz Súleımenova «Qazaqstan balalary» tujyrymdamasyn tanystyrǵanyn jazǵan edik.