Balalardy qorǵaý: TJM jazǵy maýsymǵa daıyndyqty kúsheıtti
ASTANA. KAZINFORM — Jazǵy demalys maýsymy qarsańynda Tótenshe jaǵdaılar mınıstrligi balalardyń qaýipsizdigin qamtamasyz etýge baǵyttalǵan profılaktıkalyq sharalardy kúsheıtti.
Elimiz boıynsha sýdaǵy qaýipsizdik, órttiń aldyn alý jáne tótenshe jaǵdaılarda durys áreket etý boıynsha ınteraktıvti sabaqtar, reıdter men túsindirý jumystary júrgizilip jatyr. Bul týraly Ortalyq kommýnıkatsııalar qyzmeti alańynda 1 maýsym — Halyqaralyq balalardy qorǵaý kúnine oraı uıymdastyrylǵan baspasóz májilisinde QR Tótenshe jaǵdaılar mınıstrligi Tótenshe jaǵdaılardyń aldyn alý komıteti tóraǵasynyń mindetin atqarýshy Rollan Esmaǵanbetov aıtty.
Mınıstrlik málimetinshe, elimizdiń barlyq óńirinde balalarǵa qaýipsiz minez-qulyq daǵdylaryn úıretýge baǵyttalǵan aýqymdy jumystar uıymdastyrylyp jatyr. Atap aıtqanda, halyqpen kezdesýler, túsindirý jumystary, nusqamalar, reıdter jáne ashyq sabaqtar turaqty túrde ótkiziledi.
— Jyl basynan beri TJM qyzmetkerleri 4 myńǵa jýyq ınteraktıvti sabaq, 3,5 myńnan astam ashyq jáne tájirıbelik sabaq pen synyp saǵatyn ótkizdi. Sonymen qatar mektepke deıingi mekemeler de qaýipsizdik sabaqtarymen qamtylyp otyr. Balalar úshin órt sóndirý-qutqarý bólimshelerine shamamen 2 myń ekskýrsııa uıymdastyryldy, — dedi spıker.
Sonymen qosa ol jazǵy kezeńde balalardyń sýdaǵy qaýipsizdigine erekshe nazar aýdarylǵanyn, qazirgi kezde elimiz boıynsha qaýipti ýchaskelerde 50 qutqarý stantsııasy men 169 mobıldi qutqarý beketi jumys isteıtinin atap ótti.
Budan bólek Rollan Esmaǵanbetov jyl basynan beri 8 myńnan astam bala júzýdiń bastapqy daǵdylaryn meńgergenin, sýdaǵy qaýipsizdik, alǵashqy kómek kórsetý jáne qutqarý daǵdylary boıynsha ınteraktıvti ári tájirıbelik sabaqtar ótkizilgenin de eske saldy.
Sondaı-aq mınıstrlik ókili balalardyń qaýipsizdigi kóbine eresekterdiń baqylaýyna tikeleı baılanysty ekenin basa aıtty.
— Osyǵan baılanysty TJM ata-analardy balalardy sý aıdyndary mańynda qaraýsyz qaldyrmaýǵa, tek ruqsat etilgen jerlerde shomylýǵa jáne turmystaǵy órt qaýipsizdigi erejelerin qatań saqtaýǵa shaqyrady, — dedi ol.
Buǵan deıin Astanada Halyqaralyq balalardy qorǵaý kúnine oraı 100-ge jýyq is-shara ótetini jóninde jazdyq.
