Balalardy qorǵaý salasynda qyzmetkerler sany 3,3 esege artty

ASTANA. KAZINFORM – Qazaqstanda qorǵanshylyq organdary mamandarynyń sany 3,3 esege ósip, 303-ten 1006-ǵa jetti, dep habarlaıdy Oqý-aǵartý mınıstrligi.

Bul shara otbasylarǵa kórsetiletin kómektiń aýqymyn keńeıtýge, qoljetimdilikti arttyrýǵa jáne súıemeldeýdiń sapasyn jaqsartýǵa múmkindik berdi. Jyl sońyna deıin shtat sany 1383 qyzmetkerge deıin ulǵaıtylady.

2024 jylǵy jeltoqsanda qabyldanǵan «Memlekettik nagradalar, bilim berý jáne bala quqyqtaryn qorǵaý týraly» Zańǵa sáıkes, alǵash ret naqty norma bekitildi, endi árbir 5 myń balaǵa bir mamannan bólinedi.

Sonymen qatar óńirlerde qorǵanshylyq organdarynyń jumysyn úılestiretin jańa qurylymdar qurylyp jatyr. Aqtóbe oblysynda Balalardyń quqyqtaryn qorǵaý basqarmasy ashyldy.

Jaqyn ýaqytta mundaı bólimsheler Astana qalasynda jáne Qostanaı oblysynda iske qosylady.

– Jańa shtattyq norma Qazaqstan úshin alǵash ret engizilip otyr jáne halyqaralyq standarttarǵa tolyq sáıkes keledi. Bul jergilikti deńgeıde týyndaıtyn máselelerdi jedel sheshýge, sondaı-aq balalar men olardyń otbasylaryna ýaqtyly kómek kórsetýge múmkindik beredi, – dedi QR Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova.

Buǵan deıin Oqý-aǵartý mınıstrligi Bala quqyqtary jónindegi ýákiletti organmen birlesip qorǵanshylyq organdary qyzmetkerlerine arnalǵan semınar-trenıng ótkizgen bolatyn. Onyń qorytyndysynda mamandarǵa ádistemelik usynymdar berilip, búginde olar is júzinde qoldanylyp keledi.

Aıta keteıik, balamen aralasýǵa qatysty týystar arasyndaǵy daýdy qorǵanshylyq organy sheshedi.