Balalardy kólikke otyrǵyzyp-túsirý jáne ata-anasyna tabystaý tártibin zań júzinde bekitý qajet - depýtat

ASTANA. KAZINFORM – Búgin Quryltaı otyrysynda depýtat Aıjan Naımbekova bilim berý uıymdarynyń balalardy kúndelikti tasymaldaý qaýipsizdigin qamtamasyz etýine qatysty másele kóterdi. Depýtat osyǵan oraı birden Kólik, Іshki ister jáne Oqý-aǵartý mınıstrlerine saýal joldady.

Aıjan Naımbekova
Foto: instagram.com/aizhan_naimbekova

- Búginde balalar kún saıyn balabaqshalarǵa, mektepterge jáne sport sektsııalaryna tasymaldanady. Alaıda mundaı tasymal kezindegi qaýipsizdik talaptary men memlekettik baqylaý tetikteri áli de jetildirýdi qajet etedi. 2025 jyly jol-kólik oqıǵalarynan 285 bala qaza taýyp, 12 409 bala jaraqat alǵan. Al bıylǵy jyldyń basynan beri 200-den astam bala jol apatynan kóz jumǵan. 285 bala! Bul – jaı ǵana san emes. Ár sannyń artynda balasynan aıyrylǵan otbasynyń qaıǵysy tur, - dedi ol.

Osy oraıda depýtat elimizde bolǵan birqatar qaıǵyly oqıǵalarǵa toqtaldy.

- 2023 jylǵy qazanda Túrkistan qalasynda jeke balabaqshanyń tárbıelenýshilerin tasymaldaǵan júrgizýshi bes jastaǵy balany úıiniń janynda túsirip, keıin baıqamaı kólikpen qaǵyp ketken. Bala kóz jumdy. Ata-anasy balasyn balabaqshaǵa senip tapsyrdy. Biraq ol úıine qaıta oralmady. 2024 jylǵy tamyzda Aqtóbe oblysynda jarysqa bara jatqan bes bala, al 2026 jylǵy sáýirde Túrkistan oblysynda taǵy úsh bala jol apatynan kóz jumdy. Eki jaǵdaıda da sapar týraly quzyrly organdarǵa aldyn ala habarlanbaǵan, - dedi Aıjan Naımbekova.

Depýtattyń dereginshe, 2026 jyly polıtsııa teksergen úsh myńnan astam mektep avtobýsynyń shamamen 400-inen tehnıkalyq aqaýlar anyqtalǵan. Sonymen qatar qarasha aıynyń basynda áleýmettik jelide Túrkistan oblysyndaǵy jekemenshik balabaqshanyń 12 oryndyq kóligine 30-dan astam bala otyrǵyzylǵany týraly aqparat taraǵan.

- Sondyqtan tórt baǵyt boıynsha naqty sheshimder qajet. Birinshiden, balalardy kólikke otyrǵyzý, túsirý jáne ata-anasyna tabystaý tártibin zań júzinde bekitý qajet. Ekinshiden, balalardy turaqty tasymaldaıtyn kólik quraldarynyń biryńǵaı tizilimin qurý kerek. Úshinshiden, mınıstrlikterdiń quzyreti men jaýapkershiligi naqtylaýy tıis. Tórtinshiden, memlekettik bilim berý tapsyrysy boıynsha jumys isteıtin jekemenshik uıymdarǵa da mindetti qaýipsizdik talaptaryn engizý kerek, - dedi ol.

Osyǵan baılanysty Aıjan Naımbekova Oqý-aǵartý, Іshki ister jáne Kólik mınıstrlikterinen:

- balalardy uıymdasqan jáne turaqty tasymaldaý qaýipsizdigin qamtamasyz etý úshin avtomobıl kóligi salasyndaǵy zańnamaǵa qajetti ózgerister engizý jóninde sharalar qabyldaýdy, biryńǵaı kólik tizilimin qalyptastyrýdy jáne jol-kólik oqıǵalaryn jeke esepke alý men taldaý júıesin engizýdi;

- júrgizýshiler men balalardy alyp júrýge jaýapty tulǵalardyń mindetteri men jaýapkershiligin zańnamalyq turǵydan naqtylaýdy;

- balalardy tasymaldaý qaýipsizdigine memlekettik baqylaýdy kúsheıtýdi, mınıstrlikterdiń ózara is-qımyl tártibin, aqparat almasý tetikterin jáne osy sharalardy oryndaý merzimderin aıqyndaýdy surady.

- Biz bul máseleni jańa talaptardy kóbeıtý úshin emes, balalardyń ómirin saqtaý úshin kóterip otyrmyz. Árbir balanyń ómiri birdeı qundy. Balanyń qaýipsizdigi uıymnyń memlekettik nemese jekemenshik bolýyna, tasymaldyń aqyly ne tegin bolýyna baılanysty bolmaýǵa tıis, - dedi depýtat.

Buǵan deıin depýtat Aısulý Súleımen parasportqa qoljetimdilikti keńeıtýdi usynǵan edi.