Balalardy keshki mektepterde oqytpaýǵa arnalǵan tıisti buıryq qabyldanbaq
ASTANA. KAZINFORM — Elimizdegi 34 keshki mektepte 3 myńǵa jýyq adam oqıdy. Bul týraly búgin Quryltaıdaǵy Úkimet saǵatynda Oqý-aǵartý mınıstri Juldyz Súleımenova aıtty.
- Balanyń bilim alý quqyǵy kez kelgen jaǵdaıda qamtamasyz etilýge tıis. Elimizdegi 34 keshki mektepte 2 904 adam oqıdy, onyń 855-i – kámeletke tolmaǵandar. Balalardyń keshki mektepterde oqýyna jol bermeý úshin tıisti buıryq jobasy memlekettik organdarmen kelisilip qabyldanatyn bolady, - dedi J.Súleımenova.
Onyń aıtýynsha, erekshe bilim alýdy qajet etetin 237 myń balanyń 71 myńy mektepke deıingi jasta, 166 myńy mektep jasynda jáne bul balalardyń barlyǵy ınklıýzıvti bilimmen qamtamasyz etilgen. Inklıýzıvti bilim berýge arnalǵan kabınetterge qoıylatyn talaptardy retteıtin buıryq qabyldandy.
- Quryltaı depýtattarynyń bastamasymen ázirlengen «Damýynda erekshe qajettilikteri bar balalardy keshendi qoldaý týraly» zań jobasy boıynsha jumys júrgizilýde. Taǵy bir toqtalyp ótetin másele ýaqytsha tergeý ızolıatoryndaǵy balalardyń bilim alý quqyǵyn qamtamasyz etý maqsatynda keshendi sharalar qabyldanatyn bolady. Búginde 119 bala tergeý ızolıatorynda, - dedi mınıstr.
Buǵan deıin habarlanǵandaı, Quryltaı tóraǵasynyń orynbasary Dınara Zákıeva keshki mektepterge qatysty problemany kóterdi.