Balalardy at sportyna 7 jastan bastap baýlý kerek - at ústindegi akrobatıka sheberi
ASTANA. KAZINFORM – Balany at sportyna erte jastan baýlý mańyzdy. Bul týraly sala mamandary Jibek Joly telearnasynyń «Búgin Live» baǵdarlamasynda aıtty.
– Balany sportqa 7 jastan bastap bergen durys. Bul kezde chempıon bolýǵa da múmkindik kóp, – deıdi at ústindegi akrobatıka óneriniń sheberi Ernat Sultan.
Spıkerdiń ózi de bul sport túrimen 17 jasynan bastap aınalysqan. Sodan beri halyqaralyq jarystarda el namysyn qorǵap, birqatar jetistikke jetken.
– 2018 jyly ótken Kóshpendiler oıyndary barysynda komandalyq esepte ІІ-oryn ıelendik. Al 2023 jylǵy álem chempıonatynda Qazaqstan namysyn qorǵap, ІІІ-oryn aldym. 2024 jyly Qazan qalasynda ótken BRICS oıyndarynda komandalyq esepte ІІ-oryn alsaq, jeke esepte І-oryn buıyrdy, – deıdi ol.
Konkýr sportynyń sheberi Nurbolat Qartqojaq sportqa 15 jasynda bet burǵan. Búginde ol Qazaqstan, álem jáne Ortalyq Azııa kýbogynyń kezeńderin qosa alǵanda, 40-qa jýyq jarysqa qatysqan tájirıbeli sportshy. Onyń aıtýynsha, at sporty – tek báseke emes, densaýlyqqa paıdaly baǵyt.
– Attyń ústinde adam denesin tepe-teńdikte ustap otyratyndyqtan, jaýyryn, ish pen keýde bulshyq etteri jattyǵady. Qazir kóbisi mekemede jumys istegendikten bul sport túrine hobbı retinde bet bura bastaǵan, – deıdi ol.
Degenmen, at sportynyń ózindik talaby men shekteýleri bar.
– Ol bir jaǵynan kórgen kózdi súısindirip, jan tynyshtandyratyn is sııaqty. Alaıda, keı kezde at minezin kórsetip, baǵynbaı, tipti ústindegi adamdy qulatyp ketýi ǵajap emes. At ústinde serýendegende de bala júregi kúshti rejımde jumys istep, qysym kóteriledi. Bul sportpen gıpertonııa men júrek aqaýy bar jandar aınalyspaý kerek, – deıdi sportshylar.
Sala mamandarynyń aıtýynsha, búginde elimizde at sportymen aınalysýǵa múmkindik jetkilikti. Alaıda tek qyzyǵýshylyqpen shektelmeı, sapaǵa mán berý qajet. Bul rette olar at klýbyn tańdaýǵa erekshe nazar aýdarýǵa keńes beredi. Janýarlardyń kútimi men densaýlyǵy, nusqaýshynyń biliktiligi men tájirıbesi – basty nazarda bolýy tıis.
Aıta keteıik, búgin elimizde Ulttyq sport kúni toılanyp jatyr.