Balalardy ashyq tereze aldynda qaldyrmańyz: ІІM ata-analarǵa úndeý jasady

ASTANA.KAZINFORM –  QR Іshki ister mınıstrligi elde kóktem mezgili kelýine baılanysty ata-analarǵa balalar qaýipsizdigine qatysty úndeý jasady. Bul týraly Polisia.kz jazdy.

ІІM ákimshilik polıtsııa komıteti erekshe tapsyrmalar jónindegi aǵa ınspektory Rústem Júsipbekov osy taqyryp boıynsha taldaý júrgizilgenin aıtty. Balalardyń terezelerden qulaýy balalar jaraqatynyń eń kóp taralǵan sebepteriniń biri bolyp sanalady. Mundaı jaǵdaılar ásirese qalalarda jıi kezdesedi. Kóktemgi jylýdyń bastalýymen jazataıym oqıǵalar qaýpi artady.

– Elimizde balalardyń terezeden qulaýynyń 13 faktisi tirkeldi, onda bir bala qaza taýyp, al 12-si túrli jaraqat aldy. Munyń basty sebebi – ata-analardyń balalardy baqylaýsyz, qaraýsyz qaldyrýy jáne olardyń ashyq terezelerge jaqyn bolýy. Ashyq terezeler men senimsiz moskıt torlarynyń qaýpin baǵalaı almaıtyn, ıaǵnı 7 jasqa deıingi balalar bul qaýipke ushyraýy múmkin, - dedi.

Sondaı-aq, kezdeısoq oqıǵalardyń aldyn alý maqsatynda polıtsııa ata-analarǵa qarapaıym erejelerdi ustanýdy usynady:

balany eshqashan terezeleri ashyq bólmede qaraýsyz qaldyrmańyz;

tıisti qorǵanyssyz moskıt torlaryn paıdalanbańyz;

bala terezeni ózdiginen asha almaıtyndaı etip terezelerge blokatorlardy ornatyńyz;

balanyń terezege kóterilýine jol bermeý úshin jıhazdyń barlyq túrin terezelerden alystatyńyz;

tereze torlaryn ornatyńyz.

Aıta keteıik, lıftide balany pyshaqtaǵan jasóspirimniń isi bir aı ishinde sotqa jiberiletini týraly jazǵanbyz.