Balalardan jyn shyǵaratyn emshi buryn Atyraýdaǵy meshittiń kúzetshisi bolǵan
ATYRAÝ. KAZINFORM — Áleýmettik jelide ıslam medıtsınasymen jyn shyǵarǵan emshi Keıkýat Ospanovtyń áreketi talqyǵa túsip jatyr.
Atyraýdaǵy «Imanǵalı» meshitiniń baspasóz qyzmeti emshiniń buryn meshitte kúzetshi bolǵany týraly málimet berdi.
— Keıqýat Ospanov 2009 jyly Atyraý qalasynyń ortalyq meshitinde bir-eki aı kúzetshilik qyzmetti jasaǵan. QMDB-ǵa eshbir qatysy joq. Buıryq múldem almaǵan, — dep málim etti meshittiń baspasóz qyzmeti.
Bala quqyqtary jónindegi Atyraý óńirlik ýákili Aıjan Sársembaevanyń aıtýynsha, jelidegi aqparatqa sáıkes anyqtaý bastalǵan.
— Árıne, ombýdsmen retinde jelige aqparat shyqqan boıda atalǵan derekti anyqtaý bastaldy. Balanyń úıin, ata-anasyn taýyp, sóılesýdi maqsat ettik. Atyraý oblystyq polıtsııa departamentimen birlese emshiniń ınstagram paraǵynan baılanys nómirin, qaıda turatynyn izdedik. Al emdelgen qyz balanyń Almaty oblysynda turatyny anyqtaldy. Óıtkeni emshi ár óńirge baryp, emdeý seansyn júrgizgen, — dedi Aıjan Sársembaeva.
Onyń aıtýynsha, buryn Atyraýda osyndaı bir oqıǵa bolǵan.
— Alty balasy bar otbasy 6-synypta oqıtyn balasyn mektepke jibermeı qoıǵan. Sebep – balanyń boıyna kirgen-mis. Tıisti organdarmen birge túsindirý jumysyn qolǵa aldyq. Ata-anasynyń quqyǵyn belgili bir merzimge shektep, balalaryn beıimdeý ortalyǵyna ornalastyrdyq. Psıhologtar balalarǵa keńes berdi. Sol kezde balalarda jyn kirý deregi anyqtalmady, — deıdi Aıjan Sársembaeva.
Al Keıqýat Ospanovtyń ózi áleýmettik jelidegi paraqshasynda ıslam medıtsınasymen emdeıtinin ashyq kórsetken. Emshi emdeý seanstaryn da paraqshasyna júktegen.
— Rýhııa (jyn shyǵarý), til-kóz tııý, taǵy basqa aýrýlardy quran duǵalarymen dem salý arqyly emdeımiz, — deıdi Keıqýat Ospanov.
Atyraý oblystyq polıtsııa departamentiniń baspasóz qyzmeti áleýmettik jelide taraǵan vıdeo tekserilip jatqanyn habarlady.
Eske sala keteıik, budan buryn Atyraý oblysynda JRVI juqtyrǵandardyń 64 paıyzy — 14 jasqa tolmaǵan balalar ekenin jazǵan edik.