Balalar jylynyń sońǵy kúni: ShQO-daǵy «Úmit» balalar úıine avtobýs tartý etildi

ÓSKEMEN. QazAqparat – Shyǵys Qazaqstan oblysynyń ákimi Danıal Ahmetov Balalar jylynyń sońǵy kúninde «Úmit» balalar úıine Memleket basshysynyń atynan avtobýs syıǵa tartý etti, dep habarlaıdy QazAqparat tilshisi.

Balalar jylynyń sońǵy kúninde jáne Jańa jyl qarsańynda Shyǵys Qazaqstan oblysynyń ákimi Danıal Ahmetov jetim balalar men ata-anasynyń qamqorlyǵynsyz qalǵan balalar tárbıelenetin «Úmit» balalardy qoldaý ortalyǵyna bardy. Ákim merekelik sharaǵa qatysyp, balalardy Jańa jylmen quttyqtap, árqaısysyna kitap jáne ortalyqqa shaǵyn avtobýs syılady.

«Búgin ortalyq pedagogteri munda jyly otbasylyq atmosfera qalyptastyra aldy. Úıirmeler men sektsııalar, kompıýterlik synyptar balalarǵa bos ýaqyttaryn tıimdi ótkizýge múmkindik beredi. El Prezıdenti Qasym-Jomart Toqaevtyń atynan balalarǵa kitaptar jıyntyǵy, al ortalyqqa shaǵyn avtobýs syıǵa tartyldy. 2023 jyly oblystyń barlyq mektepterinde robototehnıka synyptaryn jańartamyz. Al, «Úmit» ortalyǵynyń janynan sport ortalyǵyn salamyz, onda barlyq shaǵyn aýdannyń balalary bara alady», - dedi Danıal Ahmetov.

Ákim bıyl óńirde bala quqyqtary jónindegi óńirlik ýákil laýazymy engizilgenin atap ótti.

«Aldaǵy ýaqytta da bilim salasyna jáne balalar densaýlyǵyna erekshe nazar aýdarýdy jalǵastyramyz. Jańa jyl qarsańynda barlyq balalarǵa, ata-analar men muǵalimderge otbasylyq baqyt, densaýlyq pen amandyq, jańa tabysty jobalar tileımin. Jańa jyldaryńyzben!» - dedi oblys ákimi.

Jańa jyl qarsańyndaǵy keremet syı úshin balalar Qasym-Jomart Kemelulyna alǵys aıtty.

«Mundaı shaǵyn avtobýsty kópten beri armandadyq. Endi bizde óz avtobýsymyz bar, onymen sektsııalarǵa, úıirmelerge jáne túrli sharalarǵa baramyz», - dedi olar.

Sonymen qatar, taıaýda QR Prezıdenti men oblys ákimi Danıal Ahmetovtyń jańa jyldyq shyrshalary ótkizilgen. Merekelik sharaǵa óńirdiń túkpir-túkpirinen 450 bala qatysty. Olardyń qatarynda ata-anasynyń qamqorlyǵynsyz qalǵan jetim balalar, turmysy tómen jáne kópbalaly otbasylardan shyqqan balalar, erekshe bilim berýdi qajet etetinder, oqýda, sportta, shyǵarmashylyqta jetistikke jetken daryndy balalar boldy. Balalarǵa tátti syılyqtar men aqshalaı sertıfıkattar berildi.

Aıta ketý kerek, ShQO-da Balalar jylyna oraı 130-ǵa jýyq shara ótti. Barlyǵy 181 266 bala qamtylǵan.