Balalar jylynda búldirshinderdi qoldaý baǵytynda qandaı sharalar uıymdastyryldy
ASTANA. QazAqparat – Ortalyq kommýnıkatsııalar qyzmetinde ótken brıfıngte Oqý-aǵartý vıtse-mınıstri Ǵanı Beısembaev Balalar jylynda atqarylǵan jumystardyń qorytyndysyn jarııalady, dep habarlaıdy QazAqparat tilshisi.
«Prezıdenttiń 2022 jyldy Balalar jyly dep jarııalaýy týraly Jarlyǵynyń negizinde Úkimet qaýlysymen aǵymdaǵy jylǵy is-sharalar jospary qabyldanǵany belgili. Josparda 7 baǵyt boıynsha 66 is-shara qamtylǵan. Osyǵan sáıkes, óńirlik, aýdandyq jáne qalalyq josparlar bekitildi. Balalar jylynda 4 790 718 bala bilim berý, densaýlyq saqtaý, áleýmettik qorǵaý, mádenıet jáne sport salalaryndaǵy túrli shyǵarmashylyq, zııatkerlik, sporttyq, saýyqtyrý jáne áleýmettik jalpy alǵanda 500 myń túrli is-sharalarmen qamtyldy. Jalpy, Balalar jylyn iske asyrýǵa 12 ortalyq, 20 jergilikti memlekettik organ, 130 úkimettik emes, 20 myńnan asa oqý uıymdary qatysty», - dedi Ǵanı Beısembaev.
Vıtse-mınıstr jumystardy qorytyndylaı kele, Táýelsizdik jyldary Qazaqstan balalardyń quqyǵyn qorǵaý jónindegi 15 halyqaralyq qujatty ratıfıkatsııalaǵanyna toqtaldy. Onyń alǵashqysy - Bala quqyqtary týraly Konventsııa boldy. Sonymen qatar balalar men jasóspirimderdiń quqyqtary men kepildikterin retteıtin 50-ge jýyq normatıvtik quqyqtyq aktiler qabyldanyp, kúshine engen.
