Balalar jyly: ShQO kitaphanasynda jańa jobalar qolǵa alynbaq
Memleket basshysy Qasym-Jomart Toqaevtyń 2022 jyldy – balalar jyly dep jarııalaýyna baılanysty Shyǵys Qazaqstan oblystyq balalar jáne jasóspirimder kitaphanasynda jańa bastamalar qolǵa alynyp jatyr.
Bul jaıly bizge kitaphana qyzmetkeri Talant Meırambaev aıtyp berdi.
«Balalar jylyna oraı alǵash ret «Balalarǵa qonaqqa» jobasy júzege asyrylmaq. Mundaǵy maqsat – kitaphana qyzmetkerleriniń oblystaǵy alys-jaqyn aýyldarynda turatyn balalarǵa qonaqqa barý arqyly kitap oqýdy nasıhattaý. Sondaı-aq kóńildi sharalar da uıymdastyrylady. Balalar men ata-analarǵa arnalǵan «Meıkerspeıs: Otbasylyq sheberhana» úıirmesi de óz jumysyn bastaıdy. Bul úıirmeniń ereksheligi – árbir kezdesýde qatysýshylar oqyǵan shyǵarma keıipkerlerin tabıǵı materıaldardan óz qoldarymen jasap úırenedi», - dedi ol.
Budan bólek, balalardyń kitap oqýǵa degen qyzyǵýshylyǵyn arttyrý maqsatynda «Kitaphana+Teatr», «Úıde oqımyn», «Joldaǵy kitaptar sapary», «Bıblıosha» syndy jobalar qolǵa alynǵan.
«Osy rette, «Meıirim shýaǵy» men «Ashyq esik» atty jobalarymyzǵa erekshe toqtalyp ótkim keledi. Olar múmkindigi shekteýli jáne áleýmettik jaǵdaıy tómen balalarmen jumys isteýge arnalǵan. Sonyń aıasynda kitaphana tarapynan talantty balalardyń qalalyq jáne oblystyq jarystarǵa qatysýyna jaǵdaı jasalýda», - dedi Talant Meırambaev.
