Balalar jyly aıasyndaǵy is-sharalarǵa 48,3 mlrd. teńge bólindi – Premer-Mınıstr
NUR-SULTAN. QazAqparat – «Balalar jyly» aıasyndaǵy is-sharalarǵa 48,3 mlrd. teńge bólindi. Bul týraly búgin óziniń Facebook paraqshasynda QR Premer-Mınısstri Álıhan Smaıylov jazdy, dep habarlaıdy QazAqparat.
«Bizdiń kishkentaı balapandarymyzdyń merekesine sáıkes kelgen búgingi Úkimet otyrysynda Memleket basshysynyń Jarlyǵymen jarııalanǵan «Balalar jylyn» ótkizý máselesin talqyladyq.
Bıyl «Balalar jyly» aıasynda kóptegen is-sharalar josparlanyp, júzege asyrylýda. Bul maqsatqa memlekettik qazynadan jalpy somasy 48,3 mlrd. teńge bólindi. Olardyń barlyǵy naqty oryndalýy tıis. Eń bastysy – balalarymyzdyń qaýipsizdigin qamtamasyz etý.
Oblys ákimdikterine áleýmettik jaǵynan az qamtylǵan otbasylardyń balalaryn saýyqtyrý sharalarymen qamtýdy, olardyń jazǵy demalysta bos ýaqytyn paıdaly ótkizý máselesine kóńil bólýdi tapsyrdym»,-dep jazdy Premer-Mınıstr.
Sondaı-aq ol aýyldyq jerlerde sport alańdary men balalardy damytý ortalyqtary jabdyqtalýy tıis ekenine toqtaldy.
Densaýlyq saqtaý mınıstrligi shalǵaı eldi-mekenderdegi balalardyń densaýlyq jaǵdaıyna skrınıngtik jáne stomatologııalyq tekserýler júrgizý úshin jyljymaly medıtsınalyq pýnktterdiń jumysyn uıymdastyratyn bolady.
«Sonymen qatar balalardyń quqyǵyn saqtaýǵa, ekskýrsııalyq-tanymdyq is-sharalar uıymdastyrýǵa, olardy túrli úıirmelermen jáne sektsııalarmen qamtýǵa qatysty birqatar tapsyrmalar berdim. Barlyq óńir ákimderi «Balalar jylyna» arnalǵan is-sharalardyń oryndalýyn jeke baqylaýynda ustaýy tıis.
«Adamnyń bir qyzyǵy – bala degen» dep aqynymyz Abaı aıtqandaı, balalardyń bilim alyp, olarǵa jan-jaqty qamqorlyq jasaý, quqyqtaryn qorǵaý – memlekettiń mańyzdy mindeti. Sondyqtan keshendi is-sharalardyń barlyǵy meniń turaqty baqylaýymda bolady»,-de di Álıhan Smaıylov.
