Balalar úıiniń túlegi 17 jyldan keıin turǵyn úı kezegine qaıta turǵyzyldy

ASTANA. KAZINFORM — Qyzylordada sot balalar úıi tárbıelenýshisiniń turǵyn úı kezegine turý quqyǵyn qorǵady, dep habarlaıdy vedomstvonyń baspasóz qyzmeti.

Qyzylorda oblysynyń mamandandyrylǵan aýdanaralyq ákimshilik soty turǵyn úıge kezekke qoıýdan bas tartylǵan burynǵy balalar úıi tárbıelenýshisiniń shaǵymyn qanaǵattandyrdy.

Talap qoıýshy Sh. 1996–2008 jyldary balalar úıinde tárbıelengen. Ol 2025 jyldyń aqpanynda Qyzylorda qalasynyń turǵyn úı ınspektsııasyna júginip, 2008 jyldan beri «jetim balalar» sanaty boıynsha kezekke qoıýdy suraǵan. Alaıda ýákiletti organ qujattardyń bolmaýyna súıenip, ony kezekke qosýdan bas tartqan.

— Sot materıaldaryna sáıkes, 2008 jyly talap qoıýshy ınternattan shyqqan kezde ony avtomatty túrde turǵyn úı kezegine qoıý úshin qajetti qujattar tıisti organdarǵa ýaqytyly jiberilmegen. Sonyń saldarynan ol 17 jyldan beri óz quqyǵyn paıdalana almaı kelgen. Sot talap qoıýdy tolyq qanaǵattandyryp, Qyzylorda qalasynyń ákimi men turǵyn úı ınspektsııasyna Sh.-ny 2008 jyldyń 20 maýsymynan bastap turǵyn úı kezegine qoıýdy mindettedi, — delingen habarlamada.

Osydan buryn elimizde jetim balalardy ınternat uıymdaryna ornalastyrý tártibi ózgergeni belgili boldy.