Balalar úıiniń basshysy emshiden qorlyq kórgen oqýshy týraly aıtyp berdi

ShYMKENT. KAZINFORM. Shymkentte asyrap alǵan ógeı ákesinen qorlyq kórgen jasóspirim týraly №2 qıyn ómirlik jaǵdaıdaǵy balalarǵa qoldaý kórsetý ortalyǵynyń dırektory aıtyp berdi. 

Shymkenttegi atalǵan ortalyqtyń basshysy Laýra Boranbaevanyń aıtýynsha, 2008 jyly dúnıege kelgen jasóspirim ortalyq tárbıesinde bolǵan kezde óte aqkóńil jáne ondaǵy qyzmetkerler tarapynan eshqandaı shaǵym túspegen tárbıeli bala bolǵan. Ul balanyń alǵashynda qamqorlyqqa, keıin sot sheshimimen asyrap alǵan ata-anasy týraly pikiri oń bolǵan. Bul otbasyǵa óz qalaýymen barǵan eken.

«Men bul qyzmetke jańadan kelgenmin. Bul oqıǵanyń barlyǵy maǵan deıin bolǵan. Áriptesterimniń aıtýy boıynsha bala týraly eshqandaı shaǵym aıtylmaǵan. Óz erkimen, óz tańdaýymen sol ata-ananyń qaraýyna ótken», - dedi ol. 

Qazirgi tańda 16 jastaǵy bala jasóspirimderdi beıimdeý ortalyǵyna ornalastyrylypty. Onymen psıholog mamandary turaqty jumys júrgizip jatyr. 

«Bizde tárbıelengen baladan bólek taǵy bir bala jas erekshelikterine baılanysty sol beıimdeý ortalyǵyna ornalastyryldy. Olardyń jaǵdaıy birqalypty. Únemi baılanystamyz. Búgin ǵana taǵy habarlasyp, olardyń jaǵdaıyn, bizge berile me, joq pa sony suradym. Árıne, ony sot sheshedi. Oǵan deıin meniń áriptesterim, psıholog mamandarymyz onda birneshe ret baryp, balalardyń ózderimen sóılesti. Mundaı sıtýatsııaǵa tap bolǵan balalardy biz árqashan qoldaý kerekpiz. Olar jalǵyz emes ekenin, qoǵam qoldaý bildiretinin uqtyra bilýimiz kerek», - dedi balalar úıiniń basshysy Laýra Boranbaeva. 

Laýra Jarylqapqyzynyń sózinshe, jasóspirim mamandarǵa balalar úıine qaıtyp oralǵysy keletinin aıtypty. 

«Naqty mynandaı dep kesip aıta almaımyn. Árıne, bala ǵoı. Biraq bizdiń mamandarǵa solaı aıtqan eken. Biraq meniń bilýimshe, ol ózin asyrap alǵan ata-anasyn jaqsy kórgen. Menińshe, onymen jan-jaqty jumys júrgizý kerek sııaqty», - dedi ol. 

Balalar úıi basshysynyń sózinshe, asyrap alǵan ógeı áke tarapynan jaýyzdyq kórdi degen balalar týraly birinshi bolyp ózderi dabyl qaqqan. Emshi men onyń áıeli sot sheshimimen asyrap alǵan balalardyń úlkeni olarǵa habarlasyp, arasha suraǵan. 

«Bala bizdegi apaıyna, meniń orynbasaryma habarlasyp, bolǵan jaıtty aıtqan. Naqty kúni esimde joq, biraq bıyl aqpan aıynyń basynda dúısenbi kúni bolatyn. Meniń orynbasarymda alǵashynda senimsizdik bolypty. Bala bolǵan soń ártúrli jaǵdaı bolady. Onyń ústine ol bul otbasyna barǵanyna birneshe jyl ótken. Ekinshi ret habarlasqanynda kúdik uıalap, dereý mektebine habarlaǵan. Ondaǵylar «Barlyǵy jaqsy, jaǵdaı qalypty» dep jaýap qatqan. Keıin jasóspirim qaıta habarlasqanda biz bilim basqarmasy men Bala quqyqtary jónindegi ýákildiń Shymkent qalasy boıynsha ókiline habar berdik. Sonda baryp tekserip, shyn máninde ne bop jatqanyn anyqtaýdy suradyq. Biz balanyń taǵdyry jaýaptymyz. Ol meıli bizdiń balalar úıiniń tárbıelenýshisi bolsyn nemese basqa jaqtan kelsin. Osylaısha dabyl qaqtyq», - dedi balalar úıiniń basshysy. 

Buǵan deıin Shymkentte jergilikti emshiniń 6 balany asyrap alyp, olarǵa ıt pen mysyqtyń etin bergenin, úsh jyldan beri azaptap kelgenin jazǵan bolatynbyz. Keıinirek emshi týraly tyń derek shyqty. 

Emshi isinen soń bilim salasynyń birqatar qyzmetkeri jazalandy. Sonymen qatar qalalyq densaýlyq saqtaý basqarmasyndaǵylar balalardyń qazirgi jaǵdaıy týraly aıtyp berdi. 

Budan ózge KAZINFORM redaktsııasyna emshi asyrap alǵan balalar týraly tyń derek kelip tústi. Ondaǵy málimette búldirshinderdiń biri atalǵan otbasyǵa nebári 1,5 aılyǵynda qamqorlyqqa berilgeni kórsetilgen. Qamqorlyqqa berilgen balalardyń arasynda úsh aılyq egizder de bar. 

Ótken aptada qoǵamdyq rezonans týdyrǵan is sotqa kelip tústi. 

Búgin asyrap alǵan balalaryn qorlady degen aıyp taǵylyp otyrǵan emshiniń isin qaraıtyn sýdıa belgili boldy.