Balalar úılerinen shyqqan 12 myń jastyń tek 84-i memlekettik qordan úı aldy - QR BǴM
ASTANA. 11 qazan. QazAqparat - Búginde respýblıka boıynsha ata-anasynyń qaraýynsyz qalǵan, balalar úıi men ınternattarda tárbıelenip shyqqan 12 myń bala bar.
Olardyń tek 7 paıyzy ǵana baspanamen qamtylǵan. Búgin QR Bilim jáne ǵylym mınıstrligine qarasty oblystyq qurylymdardyń qatysýymen ótken respýblıkalyq keńeste vıtse-mınıstr Mahmetǵalı Sarybekov osyndaı málimetti jarııa etti.
Mınıstrdiń orynbasary atap kórsetkendeı, búgingi tańda elimizde balalar quqyqtaryn qorǵaý salasynda qordalanyp qalǵan máseleler kóp. Atap aıtqanda, balalarǵa zorlyq-zombylyq jasaý, olardyń eńbegin zańsyz paıdalanyp, qaraýsyz qaldyrý sııaqty zań buzýshylyqtar áli kúnge deıin bolyp jatady.
«Respýblıkada jyl saıyn 13 myńnan astam otbasy áleýmettik jaǵynan az qamtylǵandardyń qataryna qosylady. Jylda 4 myń bala ata-anasynyń qaraýynsyz qalady. Osyǵan baılanysty biz óz jumysymyzdy úılestirip, qoǵamdy atalǵan problemanyń zardaptary týraly jan-jaqty habardar etip otyrýymyz qajet», - deıdi M.Sarybekov.
Sondaı-aq vıtse-mınıstr balalar úıi men ınternat túlekterin baspanamen qamtý máselesin kóterdi. «Búginde respýblıka boıynsha osy sanattaǵy 12 myń bala bar. Olardyń tek 7 paıyzy ǵana baspanamen qamtylǵan. Sońǵy bes jyldyń ishinde 619-aq páter ınternat túlekterine berildi. Sondyqtan biz taǵdyr tálkegine túsken osyndaı balalardy búgingi ómirge beıimdeýdiń tıimdi júıesin ázirleýimiz qajet», - dep atap kórsetti M.Sarybekov.
Aıta keteıik, búginde QR Bilim jáne ǵylym mınıstrligi barlyq oblystarda Balalar quqyqtaryn qorǵaý departamentteri sııaqty jańa qurylymdardy ashty. Ol arqyly mınıstrlik osy máseleni barynsha baqylap, halyq arasynda jan-jaqty túsindirý jumystaryn júrgizýdi kózdep otyr.
