Balalar úılerinde tárbıelenýshiler sany azaıdy
ASTANA. QazAqparat - 2017–2021 jyldary Qazaqstandaǵy balalar úıleri men ınternattardyń tárbıesinde bolǵan balalardyń sany biraz azaıdy. Buǵan sábılerdi tastap ketý jáne ata-ana quqyǵynan aıyrý oqıǵalarynyń azaıýy yqpal etti, dep habarlaıdy QazAqparat Ranking.kz saıtyna silteme jasap.
«Biraq osy jyldarda bala asyrap alý jáne patronattyq tárbıeleý aıtarlyqtaı jaqsarmady. Qazaqstanda jetimder máselesi áli de bar. Pandemııa jyldarynda bala asyrap alatyndar nemese qamqorshy bolǵysy keletinderdiń sany azaıǵany baıqalyp otyr. Sondaı-aq, otbasylar arasynda tıisti túsindirý men konsýltatıvtik qoldaý kórsetilse de, elimizde balalardyń ekinshi ret jetim qalý statıstıkasy kóbeıdi. 2017–2021 jyldary asyrap alýshylar men qamqorshylardyń jetkinshekterdi balalar úılerine qaıtarýy 64 paıyzǵa kóbeıdi», - delingen Ranking.kz málimetinde.
Atap aıtqanda, bes jyl boıy ata-anasynan aıyrylǵan balalardyń sany turaqty túrde tómendegen.
QR Ulttyq statıstıka bıýrosynyń málimetinshe, 2017 jyly kámeletke tolmaǵan 27,3 myń bala jetim dep tanylǵan. 2021 jyldyń sońyna qaraı bul kórsetkish 4 myńnan astam, ıaǵnı 22,7 myń adamǵa deıin azaıdy. Olardyń 80 paıyzdan astamy nemese 18,6 myńy otbasynda turady.
«Jetim balalardy otbasynyń tárbıesine berý dınamıkasy áleýmettik faktordyń eldegi ekonomıkalyq ahýalǵa qanshalyqty táýeldi ekenin kórsetip otyr. Pandemııanyń bastalýy bala asyrap alýshylar men qamqorshylardyń birazyna tosqaýyl boldy. 2020 jyly otbasylar alǵan jetim balalardyń sany eki ese qysqardy (880-den 461 adamǵa deıin). Árıne, karantındik shekteýler de áser etti. 2021 jyldyń sońyna deıin burynǵy jaǵdaı áli de qalpyna kelgen joq», - dep atalyp ótken portal zertteýinde.
Bala asyrap alǵan keıbir otbasylar beıimdelý qıyndyqtaryn eńserýge qaýqarsyz boldy. 2017 jyly balalardy qaıtarý kórsetkishi az (109 adam) bolǵan. Al odan keıingi jyldary áldeqaıda kóp tirkeldi (eń kóbi — 199 adam). 2021 jyly memlekettik mekemelerge kámeletke tolmaǵan 179 bala oraldy. Olardyń arasynda qamqorlyq organy qyzmetkerleriniń ózderi belgili bir sebeptermen balalardy qaıtaryp alǵan kezderi de boldy. Degenmen, mundaı jaǵdaılar kóp emes.
Sondyqtan jetim balalardy asyrap alýdyń arnaıy erejesi bekitildi.
QR Bilim jáne ǵylym mınıstriniń 2020 jylǵy buıryǵy boıynsha bala asyrap alýǵa bel baılaǵandar psıhologııalyq daıyndyq kýrsynan ótip, sertıfıkat alýy tıis. Osy oraıda 2020-2021 jyldary asyraýǵa alynǵan balalardyń qaıtarylýy 13-ten 2 jaǵdaıǵa deıin azaıǵan.
Statıstıka boıynsha bala asyrap alǵandar arasynda jetkinshekterdi qaıtarý derekteri az kezdesedi. Kóp jaǵdaıda qamqorlyqqa alǵandar nemese patronattyq tárbıege alǵandar qaıtarady (99%). Al zań boıynsha olar arnaıy daıyndyqtan ótýge mindetti emes.
