Balalar úılerin tekserý kúsheıtiledi - Úkimet

NUR-SULTAN. QazAqparat – Bıyl 300 balalar úıine tekserý júrgiziledi. Bul jaıynda Májilis depýtattarynyń saýalyna QR Premer-Mınıstri Asqar Mamınniń jaýabynda aıtylǵan, dep habarlaıdy QazAqparat tilshisi.

«Balalardyń quqyqtary men zańdy múddelerin qamtamasyz etý úshin respýblıkada balalar quqyqtaryn qorǵaý salasyndaǵy memlekettik baqylaý júıesi qalyptastyrylǵan. «Nur Otan» partııasy janyndaǵy Otbasy, ááıelder men balalar quqyqtaryn qorǵaý jónindegi keńestiń jumys toby ótkizgen monıtorıng nátıjeleri 2019 jyldyń 22 qarashasynda jergilikti atqarýshy organdardyń qatysýymen QR Úkimeti janyndaǵy Kámeletke tolmaǵandar isi jáne olardyń quqyqtaryn qorǵaý jónindegi vedomstvoaralyq komıssııa otyrysynda talqylandy», - dedi ol.

Onyń atap ótýinshe, komıssııa jumysynyń qorytyndysynda jergilikti atqarýshy organdarǵa naqty usynymdar berildi. Ortalyq memlekettik organdar, komıssııa balalar quqyqtaryn qorǵaý boıynsha qyzmetterdi júzege asyratyn uıymdardaǵy kámeletke tolmaǵandardyń tárbılený, bilim alý jaǵdaılaryn baqylaýdy qamtamasyz etedi.

«Bilim jáne ǵylym, Eńbek jáne halyqty áleýmettik qorǵaý mınıstrlikteri 2020 jyly arnaýly áleýmettik qyzmet kórsetetin 386 bilim berý uıymy men 20 balalar ortalyqqa tekserý júrgizdi. Sonymen qatar 2020 jyly Bas prokýratýra ata-analarynyń qamqorlyǵynsyz qalǵan balalar men jetim balalarǵa arnalǵan 76 uıymdy eki ret tekserdi. Bıyl bul jumys kúsheıtilip, óńirlik prokýratýralar men bilim berý organdarynyń 300 balalar mekemesin keshendi tekserýi josparlanǵan. Sonymen qatar ata-analarynyń qamqorlyǵynsyz qalǵan balalar men jetim balalarǵa arnalǵan 116 uıym Qarjy mınıstrliginiń qarjylyq qyzmet bóligine memlekettik aýdıt júrgiziletin nysandar tizilimine engizilgen», - dedi Asqar Mamın.