Balalar úıiniń túlegi tuńǵysh sábıin jańa jataqhanada qarsy alady
ASTANA. QazAqparat - Pavlodar qalasynda jetim jáne ata-ana qamqorlyǵynsyz qalǵan balalarǵa arnalǵan 14 páterli jataqhananyń kiltteri balalar úıiniń túlekterine berildi, dep habarlaıdy pavlodarnews.kz.
«Úı-kúısiz júrgen balalar páter jaldap shyǵyndalmaı, aqshalaryn ózderine jınasyn degen oımen osyndaı jataqhana saldyq. Bul maqsatta byltyr oblystyq bıýdjetten qarajat bólinip, az ýaqyttyń ishinde jumysy aıaqtaldy. Úı barlyq kommýnıkatsııa jelisimen jabdyqtalǵan. Jastarymyz munda ýaqytsha ǵana turady. Keıin ózderiniń jeke úıleri bolǵanda soǵan kóshetin bolady. Sondyqtan tártip saqtap, óz úılerińizdeı kútip-baptap turyńyzdar», - dep qala ákimi Nurjan Áshimbetov jańa qonys ıelerin quttyqtady. Mamandardyń aıtýynsha, jataqhana ǵımaratyn satyp alýǵa «Jumyspen qamtýdyń jol kartasy-2020» memlekettik baǵdarlamasy aıasynda 52,7 mln. teńge bólingen. Jóndeý jumystaryn Pavlodardaǵy «Korýmbaev» jeke kásipkerligi júrgizip, bes aı ishinde tapsyrǵan. 14 páterdiń ekeýi - 40 sharshy metr, 12-si - 34 sharshy metr. Aı saıyn tólenetin páteraqysy - 3000 teńge. Ýaqytsha baspanaly bolǵan jastardyń biri - Mıchýrın balalar úıiniń dene tárbıesi páni muǵalimi Azamat Seıilǵazın. Otbasyn qurǵanyna bir jyl tolǵan azamat tuńǵysh sábıin kútip júr.
«Buǵan deıin bir jyldan astam qalanyń ár jerinen úı jaldap, kóship-qonyp júrdik. Árıne, otbasymmen birge páter jaǵalap júrý ońaıǵa soqqan joq. Osy úıden ýaqytsha baspana beriletinin estigende qatty qýandyq. Tuńǵysh sábıimizdi jańa baspanada qarsy alatyn boldyq. Qazir «Turǵyn úı qurylys jınaq banki» AQ arqyly ózimizge jeke úı satyp alý úshin aqsha jınap jatyrmyz», - deıdi ol.
Eske sala keteıik, ótken jyldyń sońynda balalar úıiniń tórt túlegine demeýshilerdi tartý arqyly ýaqytsha baspana berilgen bolatyn.
