Balalar úıiniń tárbıelenýshileri «Chelsı» fýtbol klýbyn kórip kelýge múmkindik alady
Almatyda V Qazaqstandyq jetim balalar men mektep-ınternattary arasyndaǵy «Armanyńa jaqynda» fýtbol chempıonatynyń fınaldyq oıyndary ótip jatyr.
Bıyl fınaldyq jarysqa elimizdiń 10 oblysynan 12 qurama kelip, óz baqtaryn synaýda. Jeńimpaz komanda Anglııa premer-lıgasynyń bir klýbyna barýǵa joldama alady.
Aıta ketý kerek, irikteý oıyndary elimizdiń 13 aımaǵynda 2017 jyldyń 25 sáýirinde bastalǵan bolatyn. Іrikteý kezeńinde respýblıkamyzdyń ár aımaǵynan fınaldyq joldamaǵa 26 komanda tartysqa tústi. Jalpy chempıonatqa balalar úıleri men mektep-ınternattarynan 11-14 jas aralyǵyndaǵy 250-den astam tárbıelenýshi qatysty.
«Eýropanyń beldi fýtbol klýbyna barý ár dop qýǵan jankúıerdiń armany desek artyq emes. Al bizdiń balalar úıleriniń fýtbolısterinde osyndaı zor múmkindik bar. 2013 jyldan beri Eýropanyń tanymal fýtbol klýbtaryna baryp, áıgili Messı, Roben, Havı, Torres, Grızmann syndy teńbildopshylarymen kezdesip qaıtty. Meniń oıymsha osyndaı múmkindik jas jetkinshekterdi yntalandyrady», - dedi uıymdastyrýshylardyń biri Aınur Sálimbaeva.
«Bizdiń komanda bul chempıonatta tórtinshi jyl qatarynan qatysyp kelemiz. Bıyl alǵash ret fınalǵa óttik. Barlyq qatysýshylarǵa sáttilik, ózimizge jeńis tileımin», - dedi Taldyqorǵan qalasynyń balalyr úıiniń «Aınalaıyn» komandasynyń oıynshysy Nııazbaev Temirlan.
Chempıonattyń arqasynda «Baýyrjan» qaıyrymdylyq qory men «Tsesnabank» AQ qazaqstandyq fýtbol deńgeıin kóterý maqsatynda, jetim balalar arasyndaǵy sportqa degen qabiletteri men talaptaryn jetildirýdi kózdeıdi. Sebebi áıgili fýtbol alańdaryna baryp, pir tutýshy teńbil dop sheberlerimen kezdesý balalar úshin aıtýly oqıǵa.
2013 jyldan beri chempıonattyń 45 jeńimpazy Eýropanyń bedeldi fýtbol klýbtarynda bolyp qaıtty. Úlgi tutar kóshbasshylaryna aınalǵan Messı, Roben, Havı, Ronaldo syndy fýtboldan álem maıtalmandarymen kezdesti. 2013 jyly chempıonat jeńimpazdary Esil qalasynyń № 2 balalar úıiniń tárbıelenýshileri «Barselona» fýtbol klýby men áıgili "Kamp Noý" alańyna barý múmkindigine ıe bolǵan edi.
2014 jylǵy jeńimpazdar Almaty oblystyq №1 balalar úıiniń "Barys" komandasy Mılan qalasyna joldama alyp, "Mılanello" bazasyn kórip qaıtty. 2015 jyly Qaraǵandy qalasynyń «Tańsholpan» balalar úıiniń tárbıelenýshileri chempıonatta ozyp shyǵyp, áıgili Mıýnhen qalasyndaǵy (Germanııa) ALLIANZ ARENA ortalyǵyna baryp, áıgili «Bavarııa» men «Real Madrıd» fýtbol klýbtarynyń oıynyn tamashalap qaıtty.
Byltyrǵy jylǵy jeńimpazdar Madrıdtyń «Atletıko» klýbyna baryp Ispan fýtbolynyń áıgili teńbil dopshylary Fernando Torres, Grızmann, Kokemen kezdesken bolatyn.