Balalar úıiniń tárbıelenýshi qyzdary arasynda «Pıng-pong hanshaıymy» anyqtalyp jatyr
ALMATY. QazAqparat - Qazaqstan balalar úıiniń tárbıelenýshi qyzdary Qytaıdaǵy úzdik tennıs akademııasyna barý úshin ústel tennısinen jarysty bastady, dep habarlaıdy QazAqparat tilshisi.
Eki aı qatarynan Qazaqstannyń 10 aımaǵynda irikteý oıyndary ótti. Jalpy tartysqa elimizdiń 40 balalar úılerinen 60 qyz qatysty.
Búgin sport jarysynyń fınaldyq kezeńi bastaldy.
Fınaldyq oıyndarda 20-dan astam balalar úıiniń tárbıelenýshi qyzdary baq synaıdy. Jeńimpazdar Qytaı elinde ústel tennısinen kásibı sheberlik synybynan sabaq alýǵa múmkindik alady.
«Eki aı aralyǵynda Qytaı eline joldama berer tartysqa qatysý úshin zor eńbek ettińder. Týrnırdiń basty maqsaty - jetim balalar arasyndaǵy ústel tennısi daryndaryn taýyp, qazaqstandyq tennıs deńgeıiniń artýyna birshama úles qosýdy maqsat tutady. Týrnır qyzdar arasynda 2-jas erekshelikteri boıynsha ótedi: 7- 10 jas pen 11 - 15 jas aralyǵy. Týrnır uıymdastyrýshylary bul jobany qazaqstandyq jastardyń arasynda sportqa degen qyzyǵýshylyqtaryn oıatý maqsatynda elimizdiń túkpir-túkpirindegi 100 jetimder úıine 100 tennıs oınaıtyn ústel men jabdyqtarymen qamtamasyz etti. Endi balalar úıiniń tárbıelenýshileri olımpıadalyq sport túrine enetin ústel tennısin oınap, jattyǵýǵa zor múmkindikke ıe bolady», - dedi Qazaqstannyń ústel tennısi federatsııasynyń atqarýshy dırektory Málik Beısalıev.
23 tamyzda týrnır jeńimpazy anyqtalady. Úzdik dep tanylǵan eki qyz bala Qytaıǵa sapar shegedi. Uıymdastyrýshylar atalǵan jarysty jylda ótkizip turýdy sheshti.
