Balalar úıiniń shotynan 68 mln teńge jymqyrý isi sotqa jetti

NUR-SULTAN. QazAqparat –Amaty oblysynyń Baǵanashyl shaǵyn aýdanyndaǵy №1 balalar úıinde tárıbelenýshilerdiń shottarynan qomaqty qarajat jymqyrdy dep kúdikke ilingen áleýmettik pedagogtyń isi sotqa joldandy, dep habarlaıdy QazAqparat.

Bul týraly Bala quqyqtary jónindegi ýákil Arýjan Saın óziniń Facebook-tegi paraqshasynda jazdy.

«Bylty tamyz aıynda maǵan Baǵanashyldaǵy №1 Almaty oblystyq balalar úıiniń túlekteri men tárıbelenýshileri júgindi. Olardyń memlekettik járdemaqy men áleýmettik kómek aýdarýǵa arnalǵan shottarynan aqsha urlanǵan. Balalar maǵan óz shottarynan birneshe jyl boıy bankomattar arqyly qolma-qol aqsha alynǵanyn, dúkenderde tólem jasap, basqa tulǵalardyń kartalaryna aqsha aýdarylǵanyn dáleldeıtin úzindi kóshirmeler kórsetken bolatyn» - dep eske alady Arýjan Saın.

Eske salsaq, tamyzdyń aıaǵyna qaraı osy oqıǵa boıynsha arnaıy jedel tergeý toby qurylyp, 30 jastaǵy kúdiktini Taraz qalasynda qolǵa túsirgen bolatyn.

Al bıyl aqpan aıynda Almaty qalasyndaǵy Ekonomıkalyq tergeý departamenti Qylmystyq Kodekstiń 189-babynyń 4-bóliginiń 2-tarmaǵy boıynsha tergep-tekserý jumystaryn bastady.

«Qazir áleýmettik pedagogqa qatysty asa iri mólsherde senip tapsyrylǵan bóten múlikti ıemdený nemese talan-tarajǵa salý (QR QK 189-baby 4-bóligi) jáne balalar úıiniń dırektoryna qatysty nemquraılylyq (QR QK 371-baby 1-bóligi) faktileri boıynsha qylmystyq ister sotqa joldandy. Almaty qalasynyń ekonomıkalyq tergeý departamentine osy oraıda alǵys bildiremin jáne balalar quqyqtarynyń óreskel buzylýyna jol bergen tulǵalar laıyqty jazaǵa tartylady dep úmittenemin. Eń bastysy, balalarǵa keltirilgen zalal tezirek jáne tolyq kólemde óteledi. Sot pen prokýratýra buǵan erekshe nazar aýdarady dep senemin», - dep jazdy ýákil.