Balalar úıiniń fýtbolshylary Neımarmen jáne Tıago Sılvamen kezdesedi

ALMATY. QazAqparat - Qazaqstanda balalar úıiniń tárbıelenýshileri arasynda fýtboldan chempıonattyń fınaldyq kezdesýi bastaldy, dep habarlaıdy QazAqparat tilshisi. 

Qazaqstannyń túkpir-túkpirinen jınalǵan 9 komanda 2018 jylǵy chempıon tıtýly úshin baq synasatyn bolady. 

Jeńimpaz komanda «Parı Sen-Jermen» ataqty fýtbol klýbynyń oıynshysy Neımar jáne Tıago Sılvamen kezdesedi. 

Chempıonatqa Almaty, Qaraǵandy, Semeı, Pavlodar qalalarynan 72 bala qatysyp jatyr. 

«Fýtbolda shekara bolmaýy tıis. Alty jyl boıy úzilissiz ótip kele jatqan sporttyq shara osyǵan dálel bola alady. Bul jarys balalar úshin óte mańyzdy. Bir jaǵynan sportqa baýlysa, ekinshi jaǵynan qoǵamǵa beıimdelýine, durys baǵytta ómir súrýine yqpal etedi. Biz elimizdiń ár aımaǵyn qamtyǵymyz keledi. Munda qalanyń oqýshylary ǵana emes, aýyldan kelgen balalar da oınaıdy. Olardyń kópshiligi keıinnen sportqa bet burady. Máselen Qaraǵandydan qatysqan balalar «Shahter» klýbynyń akademııasyna oqýǵa tústi», - deıdi joba jetekshisi Aınur Sálimbaeva. 
 

Uıymdastyrýshylardyń málimetinshe, 6 jyldan beri atalǵan jobanyń arqasynda 11-15  jas aralyǵyndaǵy 2 myń jasóspirim sportqa tartyldy. Olardyń 56-sy «Barselona», «Mılan», «Chelsı», «Bavarııa», «Atletıko Madrıd» komandalaryndaǵy favorıtterimen kezdesti.   
 

 «Qaırat» fýtbol klýbynyń múshesi Eldos Ahmetov balalarǵa sáttilik tiledi. 

«Olardyń bul jarysqa qatysyp jatqanynyń ózi úzdikterdiń qatarynda ekendigin bildiredi. Olardyń ynta-jigeri jemis beretini sózsiz. Fýtbol komandalyq oıyn bolǵandyqtan, olar óz kúshterine senip, birlikte bolýy tıis», - dedi E.Ahmetov. 

Aıta ketý kerek, byltyr «Tańsholpan» balalar úıiniń tárbıelenýshileri jeńimpaz atanyp, «Chelsı» aǵylshyn fýtbol klýbynyń oıynshylary  Mark Alonso, Davıdom Lýıs jáne Pedromen kezdesken bolatyn.