Balalar úıiniń burynǵy tárbıelenýshisi eki jyldan beri Aqtóbe vokzalyn panalap júr
AQTÓBE. QazAqparat - Balalar úıiniń burynǵy tárbıelenýshisi Sergeı Kandyba eki jyldan beri Aqtóbe temirjol vokzalyn panalap júr. 25 jastaǵy jigittiń jeke kýáligi joq.
Sol sebepti turaqty jumys isteı almaı, árkimniń júk dorbasyn tasyp, jan saqtap otyr, dep habarlaıdy QazAqparat tilshisi.
Sergeı Kandyba Aqtóbe oblysy, Alǵa aýdanyndaǵy Tamdy balalar úıinde tárbıelengen. Ata-anasy tiri, biraq balasynan bas tartqan. Sergeı balalar úıin 21 jasyna deıin panalap, keıin ákesi men anasyn taýyp alady. Jeke kýálik daıyndaý úshin olardyń qujattaryn jınap, barlyq kóshirmeni aýdandyq ishki ister bólimine tapsyrǵan. Biraq arada úsh jyl ótkenimen, qujat áli daıyn emes. Al Sergeı Kandyba jazda egin sharýashylyǵyndaǵy jaldamaly jumystardy istep, qysta temirjol vokzalyn panalaýdy ádetke aınaldyrǵan. Ony bári tanıdy, qoǵamdyq tártipti buzbaǵan soń polıtsııa jazalaǵan emes.
«Men erkin jatyp, uıyqtaǵan emespin. Vokzal ishinde 10-15 mınýt kóz ilip, keıin sol jerdegi tirlikti baqylap otyramyn. Poıyzdardyń júrý kestesin jatqa bilemin. Eki jyldyq ómirim osylaı ótip jatyr. Polıtsııa qyzmetkerleri alǵashqy kezde surady, baqylady. Tártip buzbaǵan soń olar maǵan eskertý jasamaıdy»,- deıdi Sergeı Kandyba.
Balalar úıiniń tárbıelenýshisi jeke kýáligin jasatyp, jumysqa ornalasýdy armandaıdy.
«Sol kezde turaqty jumysqa ornalasyp, páter jaldap, otbasy qurýǵa múmkindik bolar edi. Jazda kókónis pen jemis-jıdek egetin sharýashylyqta jaldamaly jumysshy bolyp jumys istedim. Maǵan aıyna 30 myń teńge aqsha berdi. Bul tamaǵyma jetetin edi. Qazir vokzal ishinde jolaýshylardyń júk dorbasyn kóterip, sol qyzmetime az aqsha alamyn. Kúnine 200-500 teńge tabamyn. Bul tamaǵyma jetedi»,- deıdi S.Kandyba.
