Balalar úıiniń 100-den astam tárbıelenýshisi respýblıkalyq festıvalde baq synaıdy
ASTANA. QazAqparat - Osy senbide ata-ana qamqorlyǵynsyz qalǵan balalar shyǵarmashylyǵynyń І respýblıkalyq festıvali ótedi. Festıval uıymdastyrýshylary - Qazaqstan Respýblıkasynyń Mádenıet jáne sport mınıstrligi, «Aktıv laıf» múgedekterdiń qoǵamdyq birlestigi jáne Bahytjan Tajınovtyń Shyǵarmashylyq sheberhanasy, dep habarlaıdy QazAqparat tilshisi.
Festıvalge Astana qalasyndaǵy jáne Qazaqstan Respýblıkasynyń basqa da óńirlerindegi balalar úıiniń 7 jastan 18 jasqa deıingi tárbıelenýshileri qatysady.
Elimizdiń áıgili óner sheberleri, asa kórnekti mádenıet qaıratkerleri jáne Qazaqstannyń túkpir-túkpirinen jınalǵan talantty balalar bir sahna tórinde toǵysady.
Festıval kúnderi is-shara qatysýshylary men qonaqtaryna arnalǵan shyǵarmashylyqtyń ártúrli baǵytyndaǵy ataqty mamandardyń sheberlik synyptary men semınarlary ótkiziledi.
Festıvaldiń baıqaýlyq baǵdarlamasy birneshe nomınatsııa boıynsha júrgiziledi:
1. «Estradalyq vokal» - patrıottyq ánderdi oryndaý.
2. «Zamanaýı ulttyq kıim úlgisi».
3. «Kórkem sóz» - týǵan jer týraly shyǵarmany oryndaý.
4. «Halyqtyq qolóner» - Uly dala sheberi.
5. «Fotosýret» óneri - meniń zamanymdaǵy batyrlar.
6. «Horeografııa» - qazaqtyń ulttyq bıi.
«Bul festıvalde balalardyń óneri tamashalanyp qana qoımaıdy, balalarǵa úmit, jańa ómirge bastama beriledi. Bizdiń maqsat - balalarǵa jylýlyqty, qamqorlyqty óner arqyly sezindirý. Al festıval qatysýshylaryna kelsek, «Estradalyq vokal» nomınatsııasy boıynsha 36 qatysýshy synǵa túsedi jáne de bul eń úlken kórsetkish, kelesi «Kórkem sóz» nomınatsııasynda - 23 qatysýshy, «Halyqtyq ónerde» - 21 qatysýshy, «Horeografııa» - 16 qatysýshy, «Fotosýret» - 13 qatysýshy,«Zamanaýı ulttyq kıim úlgisi» - 12 qatysýshy baq synaıtyn bolady. Eń kóp úmitker Ońtústik Qazaqstan oblysynan keldi, olardyń sany - 17 bala», - deıdi jobanyń avtory ári bas rejısseri Baqytjan Tajınov.
Baıqaý kúnderiniń qorytyndysy boıynsha kásibı ádil qazylar alqasy ár nomınatsııa boıynsha úsh júldeli orynnyń laýreattaryn jáne Gran-prı ıegerin tańdap alady.
30 maýsym kúni elimizdiń eń úlken teleortalyǵy «Qazmedıa Ortalyǵynda» úzdik horeografııalyq jáne oryndaýshylyq ujym men «Búginniń balasy -bolashaqtyń danasy» atty alǵashqy ata-ana qamqorlyǵynsyz qalǵan balalar shyǵarmashylyq respýblıkalyq festıvali jeńimpazdarynyń qatysýymen gala-kontsert ótkiziledi.
Eske sala keteıik, «QazAqparat» halyqaralyq aqparat agenttigi - atalmysh baıqaýdyń aqparattyq seriktesi.
