Balalar úıinde tárbıelenýshilerdiń baspanaǵa suranysy 2020 jylǵa deıin tolyq qanaǵattandyrylýy múmkin
ASTANA. 17 sáýir. QazAqparat - Balalar úıinde tárbıelenýshilerdiń baspanaǵa suranysy 2020 jylǵa deıin tolyq qanaǵattandyrylýy yqtımal.
Bul týraly búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine jetim balalar men ata-anasynyń qamqorlyǵynsyz qalǵan balalardyń turǵyn úıge quqyqtaryn qamtamasyz etý máseleleri boıynsha ózgerister men tolyqtyrýlar engizý týraly» zań jobasyn talqylaý barysynda Bilim jáne ǵylym vıtse-mınıstri Murat Ábenov málim etti.
Vıtse-mınıstrdiń aıtýynsha, statıstıkalyq derekterge qaraǵanda elimizde 2006 jyldan beri 384 myńnan astam páter paıdalanýǵa berilgen. Onyń ishinde jetim jáne ata-anasynyń qamqorlyǵynsyz qalǵan balalarǵa berilgen páterler sany 849 ǵana. Bul barlyq berilgen páterlerdiń 0,2 paıyzyn ǵana quraıdy. Bul rette vıtse- mınıstr jetim jáne ata-anasynyń qamqorlyǵynsyz qalǵan balalardyń páter kezeginde eshqandaı basym quqyqqa ıe bolmaı otyrǵanyna nazar aýdaryp ótti. Sondyqtan osy sanatty baspanamen qamtý qıyndap ketken. Osy olqylyqty túzetý úshin qoldanystaǵy zańnamamen jetim balalar men ata-anasynyń qamqorlyǵynsyz qalǵan balalardyń baspanamen qamtylýyna basymdyq berý, sonymen birge memlekettik turǵyn úı qorynan baspanaǵa muqtaj jetim balalardy jeke esepke alý týraly norma qamtylady.
«Qoljetimdi turǵyn úı» baǵdarlamasyna sáıkes, 2020 jylǵa deıin 69 mln 50 myń sharshy metr turǵyn úı salý kózdeledi. Qazirgi ýaqytta turǵyn úıge muqtaj balalar úılerin bitirýshiler boljamdy sany 21 myń 408 adamdy quraıdy. Olardy turǵyn úımen qamtamasyz etý úshin 856 myń 320 sharshy metr qajet. Bul jalpy josparlanǵan qurylystyń 1,2 paıyzyn ǵana quraıdy. Osylaısha basym quqyqty eskere otyryp 40 sharshy metrli bir bólmeli páter bólingen jaǵdaıda bitirýshilerdiń baspanaǵa suranysyn 2020 jylǵa deıin tolyǵymen qanaǵattandyrý múmkindigi týady», - deıdi Bilim jáne ǵylym-vıtse mınıstri Murat Ábenov.
