Balalar úıinde tárbıelenip jatqan jetimderdiń 90-95 paıyzy psıhoterapevtiń kómegine zárý
ASTANA. 22 qazan. QazAqparat - Elimizdegi balalar úıinde tárbıelenip jatqan jetimderdiń 90-95 paıyzy psıhoterapevtiń kómegine zárý. Búgin depýtat Darıǵa Nazarbaevanyń jetekshiligimen ótken Májilistegi Áleýmettik-mádenı damý komıtetiniń keńeıtilgen otyrysynda «Dara» qaıyrymdylyq qorynyń basshysy Madına Bakıeva osylaı málim etti.
Qor basshysynyń aıtýynsha, ınternat túrindegi memlekettik mekemelerge ornalastyrylǵan jetim balalar ata-ana qamqorlyǵynan ǵana aıyrylyp qalmaıdy, olardyń quqyqtarynyń jıi buzylatyny, olarǵa zorlyq-zombylyq jasalatyny týraly faktiler de udaıy kezdesedi. «Máselen, aǵymdaǵy jyly Bas prokýratýra ınternat túrindegi balalar úılerine keshendi tekserý júrgizip, onyń nátıjesi boıynsha arnaıy baıandamasyn jarııalaǵan bolatyn. Sonyń qorytyndylaryna súıensek, Qazaqstanda jetim balalardyń quqyǵy jıi buzylyp keledi. Bulardyń qataryna olardyń tynys-tirshiliginen bastap, jetimderdiń múliktik quqyqtarynyń buzylýyn da, ókinishke qaraı, zorlyq-zombylyqqa ushyraý men shekten tys qatal qarym-qatynastyń oryn alýyn da jatqyzýǵa bolady. Bundaı soraqylyqtardy aqparat quraldarynan da jıi estıtin boldyq», - deıdi M. Bakıeva.
Bul rette qor basshysy memlekettik mekemelerde tárbıelenetin balalar arasynda ásirese psıhologııalyq zorlyq-zombylyqqa ushyraıtyn jaǵdaılardyń artyp otyrǵanyn alǵa tartady. «Shyndyǵynda dál osy máselege keıde kóńil bólinbeı jatatyn sekildi. Al bizdiń psıholog-mamandarymyz ınternattaǵy jetim balalardyń arasynda testileý ótkizip, olardyń 90-95 paıyzy tereń psıhologııalyq zaqym alǵanyn anyqtap ta jatyr. ıAǵnı, mekemelerdegi balalardyń basym bóligi psıhoterapevtiń kómegine zárý degen sóz», - deıdi Qor basshysy.
