Balalar úıinde tárbıelengen qyzdar jigitterge jıi aldanyp qalady - Tańsulý Laqova

Analar úıine otbasy qurmaǵan jas analar ǵana keledi. Keıde kúıeýi uryp-soqqan áıelder kómek suraıdy. Biraq olardyń bári ózge daǵdarys ortalyǵyna baǵyttalyp jatyr. Sońǵy 4 jylda jumys tártibi bir izge túsken Analar úıi qaladaǵy perzenthanalarmen tyǵyz baılanysta jumys isteıdi. Eger jas ana «balamnan bas tartamyn» degen oıda bolsa, dárigerler habar berip, psıhologpen sóılesýge, aqyldasýǵa barady. Keıde anasy aýrýǵa shaldyǵyp, balanyń densaýlyǵynda aqaýy bolsa, ekinshi joldy tańdaıdy.
 

«Bizge perzenthanadan habar kelip, bardyq. Onda jatqan jas ana psıhologııalyq aýrýǵa shaldyqqan, arnaıy tizimde tur. Júkti kezinde dárigerge qaralmaǵan soń balasy da naýqas eken. Biz jas anamen tildestik, biraq «balań janyńda qalsyn» dep aıtpadyq. Ol emdep, balany qatarǵa qosa almaıtyn jaǵdaıda boldy. Negizinen Analar úıine kóbine jastar keledi. Keıde erekshe jaǵdaı kezdesip qalady. Máselen, aýylda turatyn qyz 30 jasynda júkti bolyp, Analar úıine keldi. Qyzdardyń kóbi «ata-anama, baýyrlaryma sóz ermesin» dep bizdi panalaıdy. Jasy bizdiń talapqa saı kelmese de ony qabyldap, jan-jaqty kómek kórsetildi. Kóbine munda eriktiler quqyqtyq keńes berip, medıatsııa tártibimen is sheshilip jatady. Keıde jigitterge habarlasyp, eki tarapty tabystyrýǵa kúsh salamyz. Er azamattyń batyly jetpeıtin jaǵdaıda ata-anasyna habar berip, sábıdiń ata-ana janynda qalýyna septigin tıgizdik. Bizge taıaýda bir qyz tústi. Ol otbasyly jigitten júkti bolǵan. Shyn máninde, ózi sengen er azamattyń otbasyly ekenin bilmegen. Balaly bolǵan soń ákelik quqyǵyn alýǵa kómektesemiz. Týǵan-týystary da alyp ketýge sheshim qabyldap otyr», - dedi Analar úıiniń úılestirýshisi Tańsulý Laqova.
 

Analar úıine balalar úıiniń tárbıelenýshileri jıi keledi. Ana mahabbaty men áke meıirimin kórmegen jastar janyndaǵy adamdarǵa senedi, «qamqor bolamyn, ǵashyqpyn» degen sózderge aldanady.

Analar úıinde ana men bala tek 6 aı tura alady. Munda olar tiginshi bolýǵa mashyqtanady. Tamaq isteıdi, úı jınaıdy. Tipti arnaıy kýrstardan ótedi, tort, toqash jasaýdy meńgeredi. Al balalardyń densaýlyǵyn medıtsına qyzmetkeri baqylap otyrady. Analar úıine kásipkerler, eriktiler jıi baryp, kómek kórsetip turady.

«Analar úıine túsken jas analardyń týǵan-týystary bolsa, tabystyryp, 6 aıdan soń sol adamdardyń qamqorlyǵyna beremiz. Al jetim balalardy ómirge beıimdeýimiz kerek. Sondyqtan qysqa merzimdi kýrstarǵa oqytyp, mamandyq beremiz. Páter jaldaýǵa kómektesemiz. Bir qýantarlyǵy, Analar úıine kelgen áıelderdiń teń jartysy turmys quryp, otbasyna oralyp, óz jolyn tabady. Barlyǵy 4 jylda 113 ana keldi, olardyń balalary janynda qaldy. Árqaısysynyń taǵdyry basqa, bir-birine uqsamaıdy. Máselen, bizge bir jigitti týǵan-týystary ákeldi. Ol ajyrasqan, áıelderden kóńili qalǵan. Jaqyndary uzaq ýaqyt otbasy qurmaǵan jigitke alańdap, bizge keldi. Dál sol ýaqytta jigittiń kóńilinen shyqqan eshkim tabylmaı, baılanys telefonyn alyp qaldym. Keıin bizge júkti qyz kelip, kómek surady. Ákesi júrek aýrýyna shaldyqqan soń aldanyp, júkti bolǵanyn aıta almaǵan qyzdy sol jigitpen tanystyrdym. Qazir olar otbasy quryp, ekinshi balasyn dúnıege ákeldi», - deıdi Tańsulý Laqova.

Qazirgi kezde óńirde bala asyrap alýshylardyń mektebi jumys istep júr. Aqtóbe qalalyq bilim bólimimen birlese atqarylatyn jumys kezinde ata-analar 12 sabaqqa qatysady. Arnaıy sertıfıkat beriledi. Olardyń árqaısysynda jeke kiltsóz bolady. Sol kiltsóz arqyly tastandy, jetim balalardyń tizimin kórip, ózi izdegen balany baýyryna basa alady. Arnaıy sabaqqa qatysý mindetti emes, biraq kýrstan ótken adamdar balamen til tabysýdy meńgerip, sábılerdiń psıhologııasyn úırenedi. Al bul ózgeniń balasyn óz baýyryna basatyn adam úshin qajetti qadam.
 

Analar úıi buryn mekenjaıyn jasyryp, qupııa ustady. Qazir bári ashyq, arnaıy belgi ilingen. Ári Analar úıiniń ujymy kórshilerimen tatý turady, keıde úıde joq, asa qajetti zattaryn suraıdy. Al kórshileri qıyndyqqa tap bolǵan jas analardy únemi qoldap otyrady.