Balalar úıi ustazdarynyń mártebesin kóterý kerek - Senat depýtaty

ASTANA. QazAqparat – Senator Nurııa Nııazova balalar úıleri men mekemelerde jumys isteıtin pedagogterdiń áleýmettik mártebesin kóterýdi usyndy, dep habarlaıdy QazAqparat tilshisi.

«Densaýlyq saqtaý uıymdarynyń, statsıonarlyq jáne jartylaı statsıonarlyq úlgidegi medıtsınalyq-áleýmettik mekemelerdiń, úıde qyzmet kórsetý, ýaqytsha bolý uıymdarynyń jáne jumyspen qamtý ortalyqtarynda ana men balany qorǵaý salasynda qyzmet atqaratyn mamandardy áleýmettik jáne materıaldyq mártebesin kóterý úshin olardy «Pedagog mártebesi týraly» QR Zańyna engizýdi tıisti mınıstrlikterge tapsyrýdy suraımyn. Budan basqa, elimizdiń Eńbek jáne halyqty áleýmettik qorǵaý mınıstrligine laýazymdyq jalaqynyń belgilengen mólsherine biryńǵaı túzetý koeffıtsıenti týraly máseleni qaraý tapsyrylsyn. Bul olarǵa teń quqyqtar men múmkindikter alýǵa múmkindik beredi», - dedi Nurııa Nııazova Senat otyrysynda saýal joldaı otyryp.

Sondaı-aq, senator balalar úıi ustazdarynyń áleýmettik jáne materıaldyq mártebesi orta bilim berý uıymdaryndaǵy áriptesterine qaraǵanda tómen ekenin aıtty. Balalar úılerinde jetimder, ata-anasynyń qamqorlyǵynsyz qalǵan, sondaı-aq túrli aýrýlary bar balalar tárbıelenip, keshendi medıtsınalyq-psıhologııalyq-pedagogıkalyq kómek alyp keledi.

«Pedagogter qaýymy da medıtsına salasynyń mamandarymen qatar, osy uıymdarda bala tárbıesimen aınalysady. Alaıda, olar salalyq pedagogıkalyq bilimi bola tursa da, «Pedagog mártebesi týraly» zańnyń aıasynan syrt qalyp keledi», - deıdi ol.