Balalar túngi qalada - 55 azamat jazalandy
ASTANA. QazAqparat - Kóliktegi ishki ister departamenti múddeli organdarmen, úkimettik emes uıymdarmen birlese otyryp, temirjol jáne áýe kóligi nysandarynda «Balalar túngi qalada» atty jedel-aldyn alý sharasyn ótkizdi.
«Aǵymdaǵy jyldyń 17-21 qyrkúıegi aralyǵynda uıymdastyrylǵan sharanyń maqsaty - jasóspirimder arasynda oryn alatyn qylmystyń aldyn alý, sondaı-aq balalar men jasóspirimderdiń túngi ýaqytta zańdy ókilderinsiz oıyn-saýyq ortalyqtarynda nemese úılerinen tys jerde júrýin boldyrmaý», - deıdi Ákimshilik polıtsııa basqarmasynyń ınspektory G. Qarsultanova.
G. Qarsultanovanyń aıtýynsha, shara barysynda QR ÁQBtK-niń 442- babynyń 2- bólimine sáıkes túngi ýaqytta úlkenderdiń ilesip júrýinsiz turǵyn úıden tys jerde júrgen jasóspirimderge qatysty 55 azamat ákimshilik jaýapkershilikke tartylyp, QR ÁQBtK-niń 127-babyna sáıkes ata-ananyń nemese basqa da zańdy ókilderdiń balalardy tárbıeleý jónindegi mindetterdi oryndamaýyna qatysty 2 fakti, QR ÁQBtK-niń 200-babyna sáıkes Qazaqstan Respýblıkasy zańnamasynyń alkogol ónimin ótkizý jónindegi talaptaryn buzý boıynsha 2 fakti anyqtalǵan.
Máselen, aǵymdaǵy jyldyń 21 qyrkúıeginde Kókshetaý stansasyndaǵy ishki ister jelilik bóliminde «Nur Otan» partııasy ókilderiniń qatysýymen Qazaqstan Respýblıkasy zańnamasynyń alkogol ónimin ótkizý jónindegi talaptaryn buzýǵa qatysty derekterdi anyqtaý maqsatynda túngi ýaqytta ótkizilgen reıdtik sharalar barysynda syra ónimin ótkizý faktisi anyqtaldy.
Tekserý kezinde Jeke kásipkerlikke tıesili dúkenniń satýshysy 1996 jylǵy azamatqa túngi ýaqytta syra satqandyǵy belgili boldy.
Qazirgi ýaqytta satýshyǵa qatysty QR ÁQBtK-niń 200-babyna sáıkes tıisti qujattar daıyndalyp, Kókshetaý qalasynyń Mamandandyrylǵan sotyna joldandy. Departamenttiń Ákimshilik polıtsııa basqarmasynyń málimeti boıynsha, jyl basynan beri túngi ýaqytta zańdy ókilderiniń ilesip júrýinsiz turǵyn úıden tys jerde júrgen jasóspirimderge qatysty 280 azamat ákimshilik jaýapkershilikke tartylǵan, dep habarlaıdy Kóliktegi ІІD baspasóz qyzmeti.
