Balalar sportyn damytýǵa erekshe nazar aýdarý kerek - Qambar Omarov

NUR-SULTAN. QazAqparat – Balalar sportyn damytýǵa erekshe nazar aýdarý kerek. Bul týraly «QazAqparat» dırektorlar keńesiniń múshesi, MSM jobalyq keńsesiniń ahýaldyq-taldaý ortalyǵynyń jetekshisi, «Qazaqstan sportyn transformatsııalaý» jobalyq keńsesiniń jetekshisi Qambar Omarov málim etti, dep habarlaıdy QazAqparat tilshisi.

Aıta keteıik, jaqynda elimizde «Qazaqstan sportyn transformatsııalaý» jobalyq keńsesi quryldy.

«Mádenıet jáne sport mınıstriligi janynan «Qazaqstan sportyn transformatsııalaý» jobalyq keńsesi quryldy. Onyń qyzmeti sportty damytýdyń júıelik qadamdary men strategııalyq baǵyttaryn daıarlaýǵa negizdeledi. Negizgi maqsatymyz – sportpen aınalysatyn densaýlyǵy myqty ultty qalyptastyrý. Elde sportpen halyqtyń tek 30 paıyzy shuǵyldanady, al keńestik kezeńde bul kórsetkish 70-80 paıyzǵa jetken edi», - dep toqtaldy Qambar Omarov Ortalyq kommýnıkatsııalar qyzmetinde.

Osy oraıda ol balalar sportyn damytýdyń myńyzdylyǵyn atap ótti.

«Balalar men jasóspirimder gadjetterge jappaı daǵdylanyp alǵan. Ótken jyldaǵy Joldaýda Memleket basshysy bul máselege erekshe ekpin qoıyp, óskeleń urpaqty sport úıirmelerine tartýǵa qatysty tapsyrma berdi. Bıylǵy Joldaýda da Prezıdent jurttyń jáne balalardyń sportpen shuǵyldanýyna jaǵdaı jasalýy qajet ekenin qadap aıtty. Buqaralyq sport joǵary jetistik sporty úshin baza bolatyny anyq. Bul rette bolashaq Olımpıada chempıony kadrlary osy deńgeıden shyńdalady», - dedi jobalyq keńsesiniń jetekshisi.