Balalar sportyn damytýdy tejep turǵan basty máseleler ataldy
NUR-SULTAN. QazAqparat – «Mektep sporty federatsııasy» ZTB resmı ókili Álııa Túsipbekova balalardyń deniniń saýlyǵyna kóbirek nazar aýdarýǵa shaqyrdy, dep habarlaıdy QazAqparat tilshisi.
«Keıingi jyldary sportqa kóbirek mańyz berilip keledi. Qazirgi ýaqytta barlyq basymdyq kásibı sporttan balalar sportyna aýyp bara jatyr. Ókinishke qaraı jyldar boıy balalar sporty tárbıelik jáne bilim berý protsesteriniń kóleńkesinde qalyp keldi. Balalar-jasóspirimder sport mektebine bólinetin dotatsııalar jastardy jappaı sportqa tarta almady», - deıdi Álı Túsipbekova OKQ-da ótken baspasóz máslıhatynda.
Onyń aıtýynsha buryn aýladaǵy sport máselelerine de durys nazar aýdarylmaı kelgen.
«Bul turǵyda Qazaqstan kóptegen elden artta qaldy. Osynyń saldarynan ýaıymdatarlyq tendentsııamen betpe-bet kelip otyrmyz. Belsendi ómir saltyn ustanatyn balalar men jasóspirimderdiń sany 30 paıyzdan aspaı keledi. Áskerge shaqyrylatyn jastardyń 40 paıyzy densaýlyǵy boıynsha áskerı qyzmettiń talaptaryna saı kelmeıdi. Dene shynyqtyrý sabaqtary balalardyń denesin shynyqtyryp, sportqa baýlý boıynsha qajettilikke jaýap bermeıdi. Balalardyń bir bóligi kóz aýrýynan qınalsa, ekinshi bóligi semizdikten de qıyndyq kórip otyr. Balalardyń múgedektiginiń artyp kele jatqany alańdatady. Mundaǵy negizgi sebepter – týabitti anomalııa, júıke júıesiniń aýrýlary men psıhıkalyq aýytqýshylyqtar. Balalardyń denesin shynyqtyrý jáne saýyqtyrý boıynsha bilikti mamandar jetispeıdi», - dedi spıker.
Ol sóz sózinde bilim berý uıymdarynda dene shynyqtyrý men sportty damytý boıynsha sharalar kesheni az ekenin aıtady.
«Birinshi kezekte mektep sportynyń júıesi retke keltirilmegen. Júrgizilgen taldaý kórsetip otyrǵandaı, mektep saıystaryna qatysatyn quram halyqaralyq standarttarǵa saı kele bermeıdi. Burynǵydaı jergilikti atqarýshy organdar ótkizetin sporttyq saıystarǵa kóbinese balalar-jasóspirimder sport mektebiniń sportshylary tartylady», - deıdi Álııa Túsipbekova.
