Balalar sporty: Prezıdent tapsyrmasyn oryndamaǵan ákim orynbasarlary jazalanady
Mádenıet jáne sport vıtse-mınıstri Erlan Qojaqapanov Úkimet janyndaǵy kámeletke tolmaǵandardyń isteri jáne olardyń quqyqtaryn qorǵaý jónindegi vedomstvoaralyq komıssııanyń otyrysynda osyndaı málimet berdi.
«Balalar men jasóspirimderdi úıirmelermen qamtý isinde jan basyna shaǵyp qarjylandyrý tetigi iske qosylǵanyn bileizder. Osylaısha 4-18 jas aralyǵyndaǵy jastardy memlekettik tapsyrys arqyly mádenıet jáne sport úıirmelerimen qamtamasyz etý jolǵa qoıyldy.
20 sáýirde respýblıkalyq bıýdjet komıssııasy jergilikti bıýdjetten bólinetin sporttyq jáne shyǵarmashylyq tapsyrystyń kólemin maquldady. Sport baǵyty boıynsha 5 mlrd teńgege 40 539 bala men jasóspirimdi qamtý kózdelip otyr. Al mádenıet salasynda 2 mlrd 518 mln teńgege 24 529 bala men jasóspirimdi qamtý kózdelgen», - dedi vıtse-mınıstr.
Degenmen, óńirlerdiń basym bóligi bul sharýany qajetti deńgeıde atqarmaı otyrǵan kórinedi. Sondyqtan Premer-Mınıstrdiń orynbasary Eraly Toǵjanov Prezıdent tapsyrmasyn oryndamaǵa ákim orynbasarlaryn jaýapqa tartý týraly sheshim qabyldapty.
«Óńirler Memleket basshysynyń bul tapsyrmasyn sylbyr oryndap otyr. Úkimet jergilikti atqarýshy organdarǵa balalar men jasóspirimderge arnalǵan memlekettiń tapsyrystyń ishinde sporttyq jáne mádenı tapsyrystardyń úlesin 20 paıyzǵa deıin kóterýdi tapsyrǵan bolatyn. Biraq, ókinishke qaraı bul tapsyrma baıaý oryndalyp jatyr.
Úkimet basshysynyń orynbasary Eraly Toǵajnovtyń atyna osy jaıttyń bárin baıandap, hat joldaǵan bolatynbyz. Memleket basshysynyń tapsyrmasyn orynlamaǵan ákim orynbasarlaryn jazalaý týraly sheshim shyǵaryldy», - dedi Erlan Qojaqapanov.
Onyń aıtýynsha, sport baǵyty boıynsha Túrkistan, Shyǵys Qazaqstan, Aqmola, Qostanaı, Qyzylorda jáne Almaty qalalarynda balalar men jasóspirimderdi memlekettik tapsyryspen qamtý deńgeıi bir paıyzǵa da jetpeıdi. Al mádenıet baǵyty boıynsha Aqtóbe, Shyǵys Qazaqstan, Batys Qazaqstan, Qostanaı, Qyzylorda oblystarynda tapsyrystyń úlesi 1 paıyzǵa jetpegen.
