Balalar sport mektepterine jan basyna shaqqan qarjylandyrý standarty engiziledi
ASTANA. KAZINFORM — Májilis «Qazaqstan Respýblıkasynyń keıbir zańnamalyq aktilerine týrıstik salany qoldaý máseleleri boıynsha ózgerister men tolyqtyrýlar engizý týraly» Zańdy qabyldady.
Túzetýler ishki týrızmdi damytýǵa, týrıstik salany memlekettik qoldaý tetikterin odan ári jetildirýge baǵyttalǵan. «Qazaqstan Respýblıkasyndaǵy týrıstik qyzmet týraly» zańǵa ýákiletti organnyń:
— El ishinde kámeletke tolmaǵan jolaýshylardy áýe kóligimen tasymaldaý úshin týrıstik ónimge kiretin bılet baǵasyn sýbsıdııalaýǵa quqyly týrıstik ónimge;
— kelý týrızmi salasyndaǵy týrıstik ooperatorlardyń shyǵyndaryn sýbsıdııalaý mólsherine;
— týrısterdi ornalastyrý oryndaryn, vızıt-ortalyqtardy salý, rekonstrýktsııalaý kezinde kásipkerlik sýbektileri shyǵyndarynyń bir bóligin óteýge qoıylatyn talaptaryn anyqtaý quzyretterin naqtylaýǵa baǵyttalǵan túzetýler engiziledi.
Sonymen qatar ákimdikterge memlekettik qoldaý arqyly qurylǵan nemese jańǵyrtylǵan týrıstik ınfraqurylym nysandaryn kásipkerlerdiń ıelikten shyǵarylmaýyn, onyń maqsatty paıdalanylýyn baqylaý syndy jańa ókilettikter beriledi. Oǵan týrıstik oryndar, vızıt-ortalyqtary, taý shańǵysy kýrorttaryna arnalǵan jabdyqtar men tehnıka, sondaı-aq jol boıyndaǵy qyzmet kórsetý nysandary kiredi. Ákimdikterge basym týrıstik aımaqtardyń shekaralaryn anyqtaý boıynsha jańa ókilettikter berý olarǵa aımaqtyq erekshelikterdi, týrıstik áleýetti jáne osy aımaqtardyń ınfraqurylymdyq daıyndyǵyn eskerýge múmkindik beredi. Bul jergilikti deńgeıde týrızmdi keshendi ári teńgerimdi túrde damytýdy qamtamasyz etedi.
Zańdy ekinshi oqylymǵa daıyndaý barysynda depýtattar buqaralyq jáne balalar sportyn damytýǵa baǵyttalǵan túzetýler engizdi. Negizgi jańalyq balalar men jasóspirimder sport mektepterine jan basyna shaqqan qarjylandyrý standartyn engizý bolady. Bul ár sportshyǵa jumsalatyn shyǵyndy jylyna 415 000 teńgege deıin arttyrýǵa jol ashady. Qazirgi ortasha kórsetkish — 233 000 teńge.
Sondaı-aq jasóspirimder sport mektepteriniń jattyqtyrýshylary men muǵalimderiniń jalaqysyn kóterý josparlanǵan. Ol biliktilik synaǵynan ótken jáne oqý protsesin ulttyq sporttyq daıyndyq standarttaryna sáıkes júzege asyratyn mamandarǵa jattyqtyrýshylyq jáne oqytýshylyq biliktiligi úshin ústemeaqy engizý arqyly júzege asyrylady. Osylaısha, sanaty joq jas jattyqtyrýshynyń/muǵalimniń jalaqysy 150 000 teńgeden 200 000 teńgege deıin artady.
Sondaı-aq dene shynyqtyrý jáne sport salasy úshin e-Sport — tsıfrlyq platformasynyń jumys isteýin zańdy túrde bekitý usynylady. Ol sport salasyndaǵy ákimshilik derekterdi basqarýdy, jınaýdy, óńdeýdi jáne taldaýdy avtomattandyrady, sondaı-aq basqa IT júıelerimen aqparat almasýdy qamtamasyz etedi.
Budan buryn Májilis Qurylys kodeksine Senat engizgen túzetýlermen keliskenin jazǵan edik.